Eksodi te Partizani, ja prapaskena me Abdurrahimin
Ndryshime edhe në staf, Dritan Mehmeti do të jetë ndihmësi i Gegës
Partizani mbetet një kantier i hapur në prag të sezonit të ri, ku askush nuk mund ta përcaktojë me saktësi se kush do të jetë fytyra e vërtetë e skuadrës në ndeshjen e parë të kampionatit. Paqartësia më e madhe mbetet në repartin ofensiv, pasi hyrje- daljet në këtë sektor janë të shumta. Pas ikjes së malazezit Stefan Nikoliç, që iu bashkua ekipit para aventurës në Europë, një tjetër firo pritet në sulm. Besart Abdurrahimi konsiderohet i larguar nga të kuqtë, gjë të cilën e përforcon më së shumti edhe mungesa e 28-vjeçarit në seancat e fundit. Abdurrahimi iu bashkua Partizanit në merkaton e janarit, duke bërë pjesë në grupin e lojtarëve më të paguar. Përpos faktit se sulmuesi ka edhe një vit kontratë me "demat", e ardhmja e tij shikohet larg të kuqve. Lojtari ka udhëtuar drejt Kroacisë ku jeton edhe familja e tij. Mësohet se lojtari fillimisht ka njoftuar trajnerin për vendimin e tij, ku i ka sqaruar edhe arsyet e vendimit, kryesisht të karakterit familjar. Por, e ardhmja e Abdurrahimit është në dorë të drejtuesve, të cilët pritet që të mos bëhen pengesë nëse lojtari dëshiron të largohet, për vetë politikën që ka klubi për të ulur shpenzimet. Ndaj, me ardhjen në Shqipëri të drejtorit Rama, i cili ndodhet jashtë vendit, pritet që palët të ulen në bisedime për të gjetur akordin në zgjidhjen e marrëveshjes.
ARSYET- Largimi i Besart Abdurrahimit nga Partizani ka të bëjë me disa faktorë, ku pa dyshim ndikim ka edhe kërkesa e klubit për uljen e pagës, duke ditur kontributin
dhe formën që ka pasur lojtari në pjesën e dytë në sezonin e fundit. Mësohet se lojtari ka paraqitur arsye familjare për t'u larguar, pasi ka gruan shtatzënë, si dhe babanë e sëmurë. Ndaj lojtari dëshiron që të jetë në këtë moment pranë familjes së tij. Gjithashtu, edhe
lojtari nuk po gëzon formë të mirë, ku problem është bërë një dëmtim që ka marr në gju gjatë fazës përgatitore para ndeshjeve me Mariborin. Për shkak të dëmtimit të meniskut, Abdurrahimi rrezikon edhe operacionin. Por, një nga arsyet madhore që detyrojnë të
largohet është edhe mosgarantimi i vendit në formacion, pasi trajneri Gega ua ka bërë të qartë se do të luajë kush të jetë në formë dhe përgatitet më mirë në stërvitje. Ndikim në "divorcin" e mundshëm thuhet se po luajnë edhe kushtet. I lindur dhe i formuar si lojtar në Kroaci, si dhe me aktivitet në disa klube të huaja, mësohet se Abdurrahimi nuk ka qenë fort i kënaqur me kushte stërvitore që ka gjetur te Partizani, por jo me pagën dhe trajtimin. Të gjitha këto shkaqe kanë bërë që Besart Abdurrahimi të quhet i larguari i radhës nga "demat".