Shqipëria, gati për të nisur Europianin
Hysenbelliu: Jemi debutues, por duam të lëmë gjurmë
Nisi si një ide për të bërë bashkë futbollistët joprofesionistë nën një sigël, në një shoqatë të futbollit amator, por shumë shpejt ky projekt nisi të zbatohej dhe brenda një viti organizuan për herë të parë një kampionat kombëtar. Shoqata e Futbollit Amator tashmë anëtare me të drejta të barabarta në Federatën Europiane të Minifutbollit do të marrë pjesë për herë të parë në një Kampionat Europian, i cili do të zhvillohet në Ukrainë nga data 12 deri më 18 gusht.
Futbollistët më të mirë që prodhoi kampionati kombëtar do të përfaqësojnë Shqipërinë në këtë turne prestigjioz, ku kuqezinjtë bëjnë pjesë në grupin C së bashku me Bosnjë Hercegovinën, Bullgarinë, Irlandën dhe Kazakistanin. KREU I SHOQATËS
"Falë ekipeve që morën pjesë në kampionatin e parë, që i besuan këtij projekti, pasi pa ata nuk bënim dot. Falë mbështetjes që kemi pasur nga sponsorët, ku sponsori gjeneral është; "Birra Korça", "Hotel Prestige", uji "Fab", që kanë mbuluar kostot e pjesëmarrjes në këtë aktivitet. Sponsori ynë teknik që është Federata Shqiptare e Futbollit si dhe kompaninë që na mundësoi udhëtimin në Ukrainë. Falë tyre u bë e mundur që të kristalizohej ajo që e kishim ëndërruar. Shkojmë që të përfaqësojmë Shqipërinë jo vetëm si turistë, por edhe me pretendime", tha Ervin Bytyçi për "News 24", kryetar i Shoqatës së Minifutbollit Amator. TRAJNERI KOÇI
Prej tri javësh ekipi përfaqësues i Minifutbollit vijon fazën përgatitore me intensitet të plotë, trajneri Andi Koçi shprehet i kënaqur me punën e bërë. "Mendoj se kemi bërë një punë të mirë deri tani. Është një eveniment shumë i rëndësishëm dhe është viti i parë që marrim pjesë në të tillë eveniment. Shpresojmë që të arrijmë diçka pozitive", tha Koçi. FATMIR HYSENBELLIU
Fatmir Hysenbelliu ishte protagonisti kryesor i kampionatit të parë Kombëtar të Minifutbollit. Kapiteni i skuadrës "Prestigj" mbylli një
sezon perfekt, duke u shpallur kampion me ekipin e tij dhe duke fituar titullin e golashënuesit më të mirë me 22 gola në dhjetë ndeshje. Fatmiri pritet të udhëheqë ekipin kombëtar si kapiten dhe në Europian, një përgjegjësi e madhe për të dhënë më të
mirën në këtë turne.
"Qëllimi ynë nuk është thjesht të marrim pjesë dhe të shkojmë për pushime, por të shkojmë atje denjësisht dhe të synojmë te vendet e para. Synoj mbase të dal atje edhe golashënues. Ky është një test për ne, sepse është viti i parë
që organizohet ky lloj turneu. Normalisht që për mua është përgjegjësi e madhe, por kjo më bën edhe më krenar e të eci fort. Dëshiroj që të kem një performancë sa më të mirë dhe ndeshje pas ndeshjeje të rritem sa më shumë", tha Hysenbelliu.