Shkëndija bën historinë, kalon në turin e tretë të Champions-it
Tetovarët eliminojnë moldavët e Sherif Tiraspolit
Shkëndija e Tetovës ka shkruar një faqe të re në historinë e saj, pasi dje ka arritur të kualifikohet në raundin e tretë eliminator të Champions Ligës, pasi ka barazuar me gola në transfertë ndaj kampionëve të Moldavisë, Sherifit të Tiraspolit. Vendimtare në këtë kualifikim ka qenë fitorja minimale e arritur në ndeshjen e një jave më parë ndaj ekipit moldav me golin e Besart Ibrahimit, që të siguronte kualifikimin në turin tjetër, ku do të jetë përballë ekipit austriak të Red Bull Salzburg. Në ndeshjen e djeshme, tetovarët kanë qenë shumë të kujdesshëm dhe nuk i kanë dhënë asnjë mundësi kundërshtarit që t'i rrezikojë. Të vendosur me forca të shumta në mbrojtje, ekipi i drejtuar nga trajneri Qatip Osmani, është munduar në disa raste të shfrytëzojë kundërsulmin, për të shënuar golin e sigurisë, por nuk ia ka dalë. Ndërsa, moldavët gjatë gjithë kohës kanë sulmuar, por pa mundur të shënojnë dhe ta çojnë ndeshjen në shtesë, për të shpresuar më pas kualifikimin në turin tjetër. Megjithatë, turi tjetër do të jetë më i vështirë për ekipin e Osmanit, pasi ekipi austriak ka luajtur sezonin e shkuar në gjysmëfinalet e Ligës së Europës. Ndeshjen e parë, tetovarët do ta luajnë në transfertë në datën 7 ose 8 gusht, ndërsa të kthimit më
14 gusht në shtëpi. Tifozët nga ana tjetër kanë nisur organizimet për këtë ndeshje, pasi mbështetja për kuqezinjtë do të jetë maksimale si në takimin që do të luhet në transfertë, ashtu edhe në atë që luhet në shtëpi. Tre vitet e fundit Shkëndija ka pasur shumë sukses në arenën ndërkombëtare.