Gjici, i qartë: Dua kualifikimin!
“Unë flas jashtë fushe dhe ekipit i kam plotësuar çdo kusht, tani radhën e kanë lojtarët”
Kukësi ka marrë një rezultat të mirë ndaj Karabakut në ndeshjen e parë, i cili lë shumë shpresë për më tej, pasi me çdo barazim me gola kualifikohen verilindorët. Presidenti i Kukësit, Safet Gjici, në një prononcim ekskluziv për "Panorama Sport" shprehet mjaft optimist dhe ka shumë besim tek ekipi i tij. Ai thekson se ai i ka dhënë çdo gjë ekipit, ia ka plotësuar të gjitha kushtet dhe kërkesat dhe tani e kanë vetë lojtarët në dorë që të shënojë e të kalojë. Ndërsa, për çështjen "Kale" ai thotë se ka folur më parë e këto ditë kur Kukësi luan në nivele ndërkombëtare nuk do të merret me çështje të tilla, të cilave do ua jap përgjigjet më vonë. "Jemi shumë të përqendruar te ndeshja me Karabakun. E dimë që kemi përballë një skuadër me nivel, por dhe ne jemi ekip me vlera. E kemi treguar në fazën e parë me Valetën, e treguam dhe ndaj Karabakut në Shkodër. Kemi cilësi, duhet të tregojmë shumë në fushë, kam besim te çunat dhe te stafi. Unë çdo premtim e kam mbajtur deri më sot, por unë flas jashtë fushe dhe tani ata të flasin në fushë. E theksoj që kam shumë besim nga ekipi, nga të gjithë lojtarët. Jam
i bindur në forcën tonë. Për jashtë fushës kurrë nuk i kam kursyer asgjë ekipit, të gjithë e dinë që çfarë presidenti kanë. Për çështjet e tjera nuk dua të flas sot, pasi Kukësi është një klub model që nuk i mungon asgjë, është solid në çdo aspekt.
Pres vetëm kalimin e këtij turi, të gjitha jua kam plotësuar çfarë kanë kërkuar, tani ata e kanë topin, ta fusin në rrjetë dhe ta kalojmë turin. Natyrisht dhe fati do Zoti na ndihmon", kanë qenë fjalët e presidentit.