Rrumbullaku: Rëndësi ka të mos pësojmë

Mbrojtësi i majtë i Kukësit, Simon Rrumbullaku, po zhvillon ndeshje të mira dhe po kërkon suksesin me Kukësin dhe në Champions Ligë. Për faqen zyrtare të klubit, ai shprehet optimist duke kërkuar kualifikimin e ekipit të tij. Karabaku ka cilësi, por Kukësi ka vlera. "Ishte një udhëtim shumë i gjatë dhe i lodhshëm, por tani jemi këtu. Jemi akomoduar në një hotel shumë të mirë. Klima është e mirë mes lojtarëve, do pushojmë, pasi më vonë kemi stërvitje për t'u përgatitur për ndeshjen e nesërme (sotme). Në gjithë këto ndeshje, deri tani ne kemi dhënë maksimumin dhe kështu do vazhdojmë edhe nesër (sot). Besojmë që do arrijmë qëllimin që është kualifikimi. Me ndeshjen e parë që u zhvillua kundër Karabakut, pamë se nuk kishim ndonjë diferencë të madhe me këtë ekip. Sigurisht, që kjo skuadër ka lojtarë me cilësi dhe nivel shumë të lartë, por ne kemi treguar vlerat tona dhe besoj që kemi shumë mundësi të kualifikohemi dhe të bëjmë më të mirën që të arrijmë kualifikimin", ka thënë futbollisti. Kukësi nuk pësoi gol në takimin e parë e ky është një avantazh për verilindorët, e me pak kujdes rezultati i parë do i japë kualifikimin: "Rëndësi ka mos të pësojmë gol, mendoj që do na jepet mundësia që të shënojmë, që mund të na japë kualifikimin. Ne duhet të tregohemi të kujdesshëm ashtu si me Valetën, që u kualifikuam. Besoj se do ta arrijmë këtë qëllim. U përballëm me Ansi Agollin që është një lojtar shumë i mirë, kapiteni i Kombëtares. I uroj suksese, por besoj që ne do kualifikohemi", ka mbyllur Rrumbullaku.