Bindja e Brahos: Luftëtari, konkurrues edhe në sezonin e ri

"Mjeshtri i Merituar i Sportit" beson te skuadra e Kostiçit

Sefedin Braho, "Mjeshtri i Merituar i Sportit" (i vetmi që ka këtë titull në Gjirokastër) në prononcimin e tij për "Panorama Sport" shpreh bindjen e plotë se Luftëtari i sezonit të ri do të jetë sërish i suksesshëm. Për Brahon Luftëtari, pavarësisht disfatës në Kupat e Europës, në kampionat do të jetë konkurrues, i denjë për të rivalizuar si i barabartë mes 10 ekipeve elitare. "Luftëtari ka ruajtur "shtyllën kurrizore" të skuadrës së sezoneve të fundit, pavarësisht se i janë larguar lojtarë me vlera të padiskutueshme. Të zëvendësosh lojtarë si Dejvi Bregu dhe KristalAbazaj është e vështirë. Gjithsesi kam parë lojtarë interesantë, që stërviten me zell dhe përkushtim. Individi ka rolin e tij, por loja e grupit të shpërblehet

me rezultate pozitive. Këtë armë të fortë Luftëtari duhet ta trashëgojë edhe në kampionatin e ri. Çelësi i suksesit për Luftëtarin ka qenë pikërisht loja kolektive dhe familjariteti mes lojtarëve", u shpreh fillimisht Braho. Një tjetër arsye më shumë që Luftëtari të jetë po ai i sezonit të fundit, sipas Brahos, është dhe puna sistematike e stafit teknik, e

nisur kjo që nga java e parë e muajit qershor. "Jo më kot thuhet se fillimi i mbarë është gjysma e punës dhe për Luftëtarin frytet e punës së bërë aktualisht jam i bindur se do të shpërblehen në kampionatin e ri. Që të përballosh një garë të gjatë si kampionati ynë me 36 javë duhet përgatitje e lartë fizike. Këtë komponent të rëndësishëm që kërkon futbolli i

sotëm, lojtarët e Luftëtarit do të vënë në eficiencë ndeshje pas ndeshje. Stafi i ri teknik e ka ndryshuar filozofinë e stërvitjes dhe metodologjinë e saj, çka do të ndikojë për mirë në kampionat", nënvizoi më tej Braho. Starti i kampionatit të ri për Luftëtarin do të nisë me takimin ndaj Kastriotit, i cili do luhet më 19 gusht në stadiumin "Gjirokastra". Për një moral më të lartë dhe për një besim më të madh, Luftëtarit i kërkohet domosdoshmërisht rezultati pozitiv ndaj debutuesve të Kastriotit. "Ndeshja me Kastriotin, edhe pse është shpejt për të dhënë një mendim fiks do të jetë e vështirë. Për ta nisur me "këmbën e duhur" garën e gjatë, duhet qetësi dhe besim. Ditët para nisjes së kampionatit janë të mjaftueshme për të kolauduar më mirë ekipin. Kontingjenti i lojtarëve të Luftëtarit ka më shumë përvojë se kundërshtari, ndaj dhe unë besoj te fillimi i mbarë. Luftëtari ka më shumë nevojë se kurrë për mbështetje morale nga ana e tifozërisë. Është ndeshja e parë dhe tifozëria nuk do të mungojë", përfundoi Braho për "Panorama Sport". Tomor Shehu