Historia me të huajt, një formacion për Elbasanin
Nga Maqedonia në Brazil, ja futbollistët që kanë spikatur
Pas viteve 2000, në Shqipëri nisi edhe "dashuria" në masë me të huajt dhe vështirë të gjesh një skuadër në futbollin shqiptar, të të gjitha kategorive, të mos ketë pasur të paktën një lojtar të huaj. Përjashtim nuk bën sigurisht as Elbasani, madje mund të thuhet se futet te skuadrat që ka një afeksion me të huajt, teksa vit pas viti ka aderuar një futbollist jashtë kufijve të Shqipërisë. Vitin e kaluar nuk e patën këtë mundësi, për shkak të rregullores, por këtë sezon gjasat janë që të rikthehen te kjo traditë, pasi tre brazilianë kanë dalë në stërvitje me verdheblutë. Pas një vëzhgimi të "Panorama Sport", në total te verdheblutë kanë luajtur 40 futbollistë jashtë kufijve të 28 mijë kilometrave katrorë, duke futur në këtë listë edhe futbollistët nga Kosova dhe Maqedonia. "Serinë" e futbollistëve të huaj në klubin elbasanas e hapi Seth Ablade, ganezi që u afrua me verdheblutë në sezonin 2003-2004. FQINJËT
Ndoshta për shkak të lidhjeve dhe njohjeve, "sytë" për të bërë merkato janë hedhur te fqinjët dhe kryesisht te shqiptarët e Kosovës e Maqedonisë. Me numrin e tyre që ndër vite shkon në 15, për t'i shtuar kështu edhe gjashtë lojtarët e Maqedonisë. Ndër më të spikaturit është sigurisht Armend Dallku, i cili erdhi në një moshe fare të re dhe i panjohur në Elbasan, duke u bërë një futbollist i Kombëtares. Pa harruar edhe Liridon Lecin, i cili pas disa viteve u bë i "njohur" më së shumti për dyshimet për trukim në kampionatin sue-
dez. Te maqedonasit bie në sy mbrojtësi Kire Ristevski, një djalosh i ri kur erdhi në Elbasan, ndërsa sot luan në Kombëtaren e Maqedonisë. AFRIKANËT
Elbasani e nisi "aventurën" me të huajt pikërisht me një lojtar me ngjyrë, ganezin Seth Ablade. Ka qenë një risi për verdheblutë para 15 vitesh, një futbollist që nuk i mungonte as kualiteti, i cili vijon të mbetet ganezi i vetëm që ka mbrojtur ngjyrat verdheblu. Nigeria është "kampione" me gjashtë lojtarë që kanë luajtur me Elbasanin, për t'u pasuar nga Kameruni me pesë dhe Senegali me një. Të gjithë e mbajnë mend Abrahamin, djaloshi shtatshkurtër që doli kampion me Elbasanin dhe më pas shëtiti në shumë skuadra të Shqipërisë. Në vitet e krizës me verdheblutë u afrua edhe kamerunasi Jontsha, sulmuesi që kishte luajtur krah Etosë në kombëtaren e tij, por për aq pak muaj sa qëndroi në Elbasan tregoi shumë pak në krahasim me pritshmëritë.
"SAMBA"
Talentet më të mëdha zakonisht vijnë nga Brazili, por tek Elbasani ka pasur vetëm një përfaqësues. Bëhet fjalë për Mauricion, i cili me verdheblutë militoi në Kategorinë e Parë. Ndonëse ndër vite kanë ardhur edhe lojtarë të tjerë në provë, por që nuk u është ofruar një kontratë nga klubi. Gjithsesi, numri i brazilianëve mund të rritet këtë sezon, nëse njëri nga Mateos, Nildo da Silva apo Caio, të cilët kanë dalë në stërvitje me verdheblutë, do të firmoste me Elbasanin. SLLAVËT
Nuk mbeten pas as sllavët,
fqinjët tanë pak më të largët, të cilët kanë lënë shenjën e tyre në klubin e elbasanas. Me ardhjen e trajnerit të vetëm të huaj të Elbasanit, në janar të 2011-ës, boshnjakut Esad Karishik, u afruan edhe tre lojtarë serbë. Aventura e tyre zgjati pak muaj dhe me largimin e trajnerit, u larguan edhe ata. Verdheblutë kanë pasur në skuadër edhe kroatin Darko Periç, apo mbrojtësin slloven Almir Sulemanoviç, një futbollist me potencial dhe eksperiencë të gjatë.