Legia rikthehet për Ajetin, shqiptari peng i... kualifikimit

Faza e grupeve mundëson investime për mbrojtësin shqiptar

Arlind Ajeti mund të transferohet te Legia e Varshavës. Lajmi i publikuar në "Panorama Sport" disa ditë më parë, për një akord mes palëve dhe më pas mosfinalizim në fund, është konfirmuar edhe nga mediat polake pranë skuadrës së Legias. Jo vetëm kaq, por së fundmi ata tregojnë edhe pengesat që nuk lejuan shqiptarin të transferohej në Poloni. Momentalisht, transferimi i Ajetit në Poloni është peng i rezultateve të Legias në fazën kualifikuese në Ligën e Kampionëve apo në Ligën e Europës. TRATATIVAT - Legia e Varshavës e ka rikthyer Ajetin në krye të listës së dëshirave për merkaton. Mirëpo, nga sa bëhet me dije në Poloni, shqiptari mbetet peng i kualifikimit në fazën e grupeve. Nëse ekipi polak do të sigurojë grupet në Champions apo në Ligën e Europës, financat do të shtoheshin dhe klubi do të kryente lehtësisht shpenzime. Nga sa bëhet me dije, në Varshavë kanë plan për të kompletuar skuadrën me lojtarë që kanë eksperiencë dhe që mund të përballojnë edhe kompeticione të tilla.

"PRESIONI" - Shqiptari është thuajse i larguar nga Torino, e cila nuk e ka në plane, mirëpo interesimi për të nuk mungon. Në Poloni raportohet që për të ka interes Palermo në Itali, por edhe nga Frajburg në Bundesligën gjermane si dhe Nimes në Francë. Secila prej këtyre pistave duket se ka shërbyer si "presion" për klubin polak që të pranojë parimisht kërkesat e mbrojtësit shqiptar.

Në total, transferimi mund të kushtojë deri në 1.5 milionë euro, duke përfshirë pagesën për kartonin, detyrimet e ndryshme në federatë dhe ndaj menaxherit, si dhe për pagën e lojtarit për periudhën e qëndrimit te Legia. E për të bërë të mundur që Legia ta paguajë këtë gjë, duhet kualifikimi në grupet e Champions ose minimumi në grupet e Ligës së Europës.