Vidal vjen të shtunën, ja si ndryshon Interi

Spaleti fërkon duart, tani ka “dy” skuadrat që kërkonte

asi ka arritur marrëveshjen për Sime Vrsalikon, tashmë Interi do përqendrojë të gjitha forcat te goditja e fundit e merkatos. Arturo Vidal do plotësojë "mozaikun", duke i dhuruar Spaletit një tjetër kampion pas Naingolanit. Bajerni i Mynihut në fakt duket t'i jetë dorëzuar ofertës së paraqitur nga drejtori sportiv Piero Auzilio. Kiliani do transferohet përmes formulës së huazimit për një total prej 20-22 milionë eurosh. Një shifër absolutisht e përballueshme, edhe pse mbetet për t'u përcaktuar kostoja e huazimit (pritet të jetë, sipas mediave italiane, 8 milionë: kështu do plotësoheshin 30 milionët e kërkuar nga bavarezët për mesfushorin). Ndërsa lojtarit në krahun tjetër i është ofruar një kontratë trevjeçare prej 4,5 milionësh në sezon. Gjithçka do ecë përpara, megjithatë, pasi Vidal të ketë firmosur zgjatjen e kontratës së tij aktuale me gjermanët, në skadencë në vitin 2019, me një tjetër sezon. Pasi të jetë firmosur kontrata me bavarezët, do hapen dyert e transferimit në Milano, ku Vidal mund të zbarkojë që ditën e shtunë dhe mund të "gjejë" fanellën e tij të preferuar. Në këtë aspekt, një tregues ka ardhur nga faqja zyrtare e zikaltërve: Zhoao Miranda, që kishte zgjedhur 23-shin (numrin e Arturos), ka kaluar sërish te 25-a. Kur vjen "mbreti", çdo dëshirë e tij është urdhër.

VARIANTE - E tashmë, Luçiano Spaleti mund të fërkojë duart dhe të buzëqeshë, jo më me "ngërdheshje" siç e ka "zakon", pasi nuk i mungojnë më alternativat. Madje, ka "dy" skuadra të bazuara (nga dy elementë për rol) në skemën 4-2-3-1 e mund të përdorë edhe modulin me tre mbrojtës. Të shumtë pyesin nëse dyshja Vidal-Naingolan do mund të "bashkëjetojë". Në pritje të "përgjigjes" nga fusha, njërën e jep historia: të dy kanë treguar gjatë karrierës se zotërojnë një polivalencë taktike që ia lehtëson punën çdo trajneri. Pa lënë mënjanë edhe vlerën e shtuar në qendër të mbrojtjes me holandezin De Vraj (përkrah "murit" tjetër Shkrinjar), krahun e majtë të mbrojtjes ku ka ardhur Azamoah dhe anën e djathtë të këtij reparti, ku do të luajë nënkampioni i botës, Vrsaliko. Afrimi i të cilit gëzon më tepër trajnerin zikaltër: jo vetëm sepse mbush më në fund hapësirën e lënë nga largimi i Kanselos, por mbi të gjitha sepse ka nëpër duar një lojtar taktikisht të disponueshëm në module të ndryshme (me mbrojtjen me tre apo me katër). Tani do i takojë Spaletit t'i japë një identitet preciz taktik. Zgjedhjet në dispozicion të trajnerit interist janë të shumta: 4-2-3-1 (sistemi më i përdorur gjatë sezonit të kaluar) apo mbrojtja me 3, modul i provuar vazhdimisht gjatë fazës përgatitore.