Kërcënohet nga PSG, Çelsi lan me ar Kantenë

Mesfushorit francez i ofrohet kontratë e re 5-vjeçare, do bëhej më i paguari në klub

Çelsi i ka ofruar N'Golo Kantesë dyfishin e rrogës në "Stamford Bridge", duke e bërë lojtarin më të paguar të klubit ( më i paguar edhe se Hazard, i cili aktualisht fiton 220 mijë paund në javë), për ta mbajtur larg kthetrave të PSGsë. Forma e mesfushorit francez nga Leiçesteri te blutë e Londrës ka njohur vetëm rritje dhe qershia mbi tortë ishte Botërori fantastik i 27- vjeçarit, duke shtuar edhe admiruesit e tij. Dhe "The Times" shkruan se Çelsi nuk mund të lejojë të humbasë një prej lojtarëve më të mirë të tij dhe për ta blinduar i ofron 15 milionë paund në vit për 5 vitet e ardhshme (290 mijë në javë). Kante, i cili erdhi për 30 milionë paund në Londër në vitin 2016, ka një kontratë që skadon në vitin 2021 dhe nuk ka lëshuar asnjëherë sinjale largimi nga "Stamford Bridge". HAZARD - Një kontratë e tillë nuk pritet të xhelozohet nga yjet e tjerë të Sarrit. Sepse nëse Eden Hazard vendos të qëndrojë në Londër dhe sot për sot gjasat janë më të shumta që kjo të ndodhë dhe jo të transferohet në Madrid, atëherë ai do të bëhet sërish futbollisti më i paguar i klubit. Çelsi i ka përgatitur një kontratë të re prej 300 mijë paundësh në javë, përveç së cilës do t'i dorëzojë edhe shiritin e kapitenit. UILLIAN - Uillian do të paraqitet sot në stërvitjen e Çelsit pas lajmeve se braziliani ishte rebeluar në kërkim të largimit nga "Stamford Bridge". Klubi i hodhi poshtë zërat e refuzimit të sulmuesit për të veshur sërish fanellën e Çelsit, duke thënë se ai nuk arriti dot të vinte në Londër që të martën për shkak të një problemi me pasaportën. 29-vjeçari ka qenë këtë verë një objektiv i Mançester Junajtid dhe Barcelonës, me këta të fundit që bënë edhe disa oferta zyrtare për ta transferuar në "Camp Nou", por që hasën refuzimin e anglezëve. Këta të fundit transferuan Malkomin nga Bordoja më pas dhe u tërhoqën, por në skenë u fut Reali, që ishte gati të ofronte 100 milionë paund për të dhe Kurtuanë. Gjithsesi, spanjollët e mohojnë interesin për brazilianin.