Arrihet akordi,por Higuain do 6.5 milionë € nga Juvja
Dje pati një tjetër dopio takim, por mungon zyrtarizimi
Fryma e optimizmit nuk mungon nga të dyja palët, por për zyrtarizimin shtyhen ende kohët. Ndërsa, ditën e hënë takimi i vëllait-menaxher të Gonzalo Higuainit zgjati deri pas mesnate me drejtuesit e Milanit, dje pasdite, në orën 16:25, Nikolas Higuain, drejtori i përgjithshëm bardhezi, Xhuzepe Marota dhe ai sportiv Fabio Paratiçi, u ngjitën në "Casa Milan", selinë e skuadrës kuqezi, për të tentuar që të mbyllnin përfundimisht këtë marrëveshje që do të dërgojë "Pipitan" në strofkën e "Djallit". Por, edhe pse takimi kokë më kokë zgjati gati 70 minuta, në fund të dyja palët dolën të ndara, ndonëse ai që po e frenon më shumë se kushdo tjetër këtë akord është vetë Gonzalo. "Higuain i Milanit? As që duket pranë", ishte reagimi i Xhuzepe Marotës, pas takimit me kuqezinjtë.
NGËRÇI - Ashtu siç u përfol edhe ditën e hënë, është sulmuesi 30-vjeçar që kërkon të "hakmerret" ndaj Juventusit, për mënyrën e trajtimit që po i bëjnë, pas ardhjes së Kristiano Ronaldos. Duke qenë se është "Zonja e Vjetër" që shtyn shitjen e tij, "Pipita" kërkon të paktën për mënyrën e trajtimit dhe mbrojtjen e imazhit të tij, shifrën e 6.5 milionë eurove, çfarë korrespondon edhe me pagën e një viti (pa bonuset) që garanton kontrata me torinezët, e cila është e vlefshme deri në vitin 2021. Nga ana tjetër, Milani i ka garantuar Higuainit se së bashku me bonuset, lojtari do të mundë të kapë pagën që fitonte te Juventusi, por argjentinasi nuk ka ndërmend që të heqë dorë nga kërkesa financiare që u ka bërë kampionëve të Italisë. Në të njëjtën kohë, mes Milanit dhe Juventusit është rënë dakord se çështja "Higuain" do të bisedohet veçmas tratativës që mund të lidhë shkëmbimin Bonuçi-Kaldara, për të mos shkartisur më kot letrat dhe bilancet e të dyja klubeve.
SHIFRAT - Duke qëndruar te mbledhja e djeshme, të dyja klubet kanë konfirmuar shifrat e rëna dakord që të hënën: 18 milionë euro për huazimin dhe 36-37 milionë euro të tjera për shlyerjen definitive të lojtarit. Gjithsesi, duke pasur problemet me "Fair Play Financiar", në kontratë nuk do të shkruhet "detyrim blerjeje" për Milanin. Por, kjo do të jetë vetëm një "hile" dhe një pakt xhentëllmenësh mes klubeve, në mënyrë që bilancet e kuqezinjve të mos fryhen edhe më shumë nga borxhet.