Laçin e gjykon arbitri që humbi valixhet në Rinas

Asgjë nuk është e pamundur në futboll dhe Laçi do të provojë të përmbysë ndeshjen e parë të humbur 3-0 kundër norvegjezëve të Moldes. Misioni është i vështirë, por të besuarit e Prengës kërkojnë të bëjnë mrekullinë në ndeshjen e dytë kualifikuese në këtë raund të Ligës së Europës. Megjithëse kualifikimi për në raundin e dytë të Europës është diçka shumë pozitive, kurbinasit do të provojnë për të vazhduar ëndrrën e tyre në këtë kompeticion të rëndësishëm. NDESHJET- Kjo do të jetë ndeshja e 14-të e Laçit në Kupat e Europës dhe nëse ka diçka pozitive është ecuria e sfidave të luajtura në shtëpi. Deri tani kurbinasit kanë zhvilluar 6 ndeshje në Shqipëri dhe bilanci është 3 barazime, 1 fitore dhe 2 humbje. Kurbinasit kanë shënuar në 4 ndeshje, ndërsa në dy të tjera nuk ia kanë dalë të gjejnë portën kundërshtare. Kundër Dnipër Mogilev në debutimin europian Laçi ka barazuar 1-1 dhe më vonë në sezonin 20132014 nuk arriti të shënonte dhe humbi 0-1 me Diferdanzhin. Një vitit më vonë arriti të barazonte sërish me Rudar Velenjen 1-1 dhe në fazën e dytë të Ligës së Europës u përball me Zoria Luhansk dhe humbi 0-3 në shtëpi. Në sezonin 2015-2015 kurbinasit prodhuan një tjetër 1- 1 kundër Inter Baku dhe në transfertë morën një barazim 0-0. Për fat të keq, kundërshtarët u kualifikuan për shkak të golit në transfertë. Për të ardhur te ndeshja e fundit, e cila u fitua 1-0 kundër Anorthosisit dhe ishte triumfi i parë në Kupat e Europës. Laçi do të kërkojë triumfin e dytë në këtë kompeticion, pse jo për të mbajtur gjallë shpresat për një kualifikim, por edhe për t'u përshëndetur në mënyrën më të mirë të mundshme. Por për ta arritur këtë, Laçi duhet të thyejë një tabu. Deri tani në 13 ndeshjet e mëparshme nuk ka arritur të shënojë kurrë më shumë sesa 1 gol. Kundër Moldes duhen 3, por një i shpejtë mund të ndryshojë gjithçka.