“Tërmet” te Kukësi, gati largimi i katër lojtarëve
Klubi pranë akordit me sulmuesin Emanuele Mensah, ka luajtur te Laçi
Zhvillime të rrufeshme te Kukësi menjëherë pas eliminimit nga turi i dytë i Ligës së Kampioneve. "Panorama Sport" mëson se drejtuesit e klubit kanë diskutuar dje afrimin e sulmuesit ganez, Emanuel Mensah. Ky i fundit nuk është i panjohur për kampionatin shqiptar, pasi në sezonin 2016- 2017 luajti për Laçin 17 ndeshje dhe shënoi katër gola. Në kampionatin e kaluar 24-vjeçari ka qenë pjesë e Atromitos në Superligën greke, por vetëm gjysmën e parë të sezonit. Pas 7 ndeshjeve aktivizim dhe asnjë goli, ai u largua në janar të këtij viti te skuadra tjetër greke, Kerkyra, ku luajti vetëm në tre takime. Tashmë është lojtar i lirë dhe pas dhënies së OK-it nga trajneri Armando Cungu, pritet që Mensah të takohet sot me drejtorin Nderim Nexhipi. Ende nuk mund të flitet për një akord, por gjasat janë që të arrihet një marrëveshje, nisur edhe nga bisedimet paraprake që janë bërë me menaxherin e lojtarit. Ndërkohë, nëse Mensah zyrtarizohet, atëherë sipas të gjitha gjasave, Sebino Plaku do të largohet nga Kukësi. Sulmuesi ka firmosur një marrëveshje për Kupat e Europës, që do të rishikohet vetëm pas eliminimit të Kukësit nga kompeticionet e UEFA-s. Mësohet se edhe vetë Plaku nuk ka më dëshirë të vazhdojë me Kukësin, por gjithçka mbetet për t'u parë në ditët në vijim. Ndërkohë, i larguar nga verilindorët mund të quhet braziliani Roxher Rodrigez, i cili nuk u grumbullua në asnjë nga ndeshjet e Europës. Mesfushori i ardhur me bujë për të zëvendësuar Elton Kale nuk ka bindur stafin dhe po shikohet mundësia e prishjes së kontratës me marrëveshje. 22vjeçari firmosi dhe u prezantua nga klubi, por rezultoi një lëvizje e dështuar në merkato. Surpriza më e madhe në listën e largimeve është edhe Irakli Dzaria. Gjeorgjiani që u bë hero me golin ndaj Valetës duhet të rishikojë marrëveshjen, pasi i skadon pas Kupave të Europës. Gazeta zbulon nga burime në klub, se sipas të gjitha gjasave, ai nuk do të jetë më pjesë e Kukësit pas përfundimit të angazhimit në Europë. ZHGËNJIM DHE UDHËTIM RRASKAPITËS
Kukësi u mund me rezultat
të thellë 3-0 nga Karabaku në takimin e dytë dhe kjo humbje u përjetuan si katastrofë për gjithë pjesëtarët e Kukësit, duke filluar që nga presidenti Gjici e deri te futbollisti i fundit. Gazeta mëson se zhgënjimi i lojtarëve nisi në fushë e u transmetua në dhomat e zhveshjeve e më pas në hotel. Sapo përfundoi takimi, lojtarët e Kukësit të gjithë u futën te dhomat e zhveshjeve, zhgënjimi e mërzia e tyre ishte e madhe. Duke parë çka ekipi dha në fushë, dy prej senatorëve, kapiteni Shameti e Besar Musolli, folën me zë të lartë para grupit ku theksuan se ky nuk ishte Kukësi, e se të gjithë duhet të kishin turp nga kjo ndeshje e zhvilluar. Ndër lojtarët më të prekur ka qenë edhe portieri Stivi Frashëri, i cili dhe pse zhvilloi një ndeshje të mirë, penalltia e parë e shkaktuar e preku shumë. Frashëri arriti të neutralizonte e mbante në lojë
Kukësin mbas pritjes së penalltisë së dytë të Karabakut. Më pas grupin e ka qetësuar trajneri Cungu dhe drejtori Nderim Nexhipi, të cilët theksuan se çdo gjë u bë keq, pasi Kukësi luajti dobët, por me kurajë dhe forcë çdo gjë do të bëhet më mirë. Ekipi duhet të rregullojë gabimet. Nuk kanë munguar dhe ngritjet e zërit dhe shfryrjet nga disa lojtarë që kanë qenë mjaft të nervozuar. PRESIDENTI GJICI
Sapo ka përfunduar takimi, presidenti Gjici nuk zbriti të takonte ekipin, madje shumë i mërzitur e i zhgënjyer ai i ka thënë një pjesëtari të stafit se donte ta takonte ekipin pas ndeshjes. Kreu i klubit e mbajti fjalën e nuk takoi asnjë prej lojtarëve as në ditën pas takimit. Mbas përfundimit të takimit, gazeta mëson se presidenti Gjici thirri në një takim të shkurtër, por urgjent, drejtorin Nderim
Nexhipi dhe trajnerin Cungu, të cilëve u kërkoi llogari pse ndodhi kjo humbje në këtë mënyrë. Të dy zyrtarët i dhanë shpjegimet përkatëse presidentit në lidhje me paraqitjen e ekipit, e më pas ky i fundit u zbut, duke u kërkuar dy udhëheqësve të ekipit, që përgatisnin relacion për çdo lojtar, si dhe duhen marrë masa për disa futbollistë për ndeshjen e radhës.
DËNIMI DHE AXHENDA
Sikur mos të mjaftonte zhgënjimi i humbjes ndaj Karabakut, skuadrës do i duhet të përgatitej për një udhëtim rraskapitës. Ekipit i duhej të nisej në orën 20:05 nga Bakuja drejt Stambollit. Në metropolin turk Kukësi duhet të qëndronte 8 orë në pritje, pra të gdhinte gjithë natën në aeroport, e rreth orës 06:00 të mëngjesit të sotëm avioni do të nisej drejt Tiranës. Në orën 08:00 futbollistët pritet të mbërrijnë në aeroportin "Nënë Tereza".