Kastrioti bind në testin e dytë, barazon me qipriotët

Pas humbjes kundër AEL Limasolit, krutanët luajnë më mirë

Kastrioti barazoi pa gola në miqësoren e dytë të zhvilluar në Bullgari. Krutanët u përballën dje me qipriotët e Nea Selamina, ekip nga Superliga e vendit ishullor. Tekniku Elvis Plori hodhi në fushë një formacion me ndryshime në rreshtim, por edhe me dy lojtarë të ndryshëm nga ndeshja e parë me AEL Limasolin, duke provuar Cacën në vend të Shehit dhe Markun në vend të Atsinës, zëvendësime që, duke parë ndeshjen, rezultuan efikase. Ndeshja - Takimi nis i qetë, me të dy skuadrat që studiojnë njëratjetrën. Krutanët shfaqen më rrezikshëm me Bardhin, i cili ka një mundësi "të artë" për të kaluar krutanët në avantazh, por nuk arrin të shënjestrojë si duhet. Miqtë kundërpërgjigjen menjëherë, por është Kuka ai që mban të paprekur katërkëndorin e tij. Një tjetër rast të pastër kishte edhe Rrahim, por "sfera" e goditur prej tij "qeth" shtyllën pingule, duke përfunduar jashtë. Pavarësisht se pjesa e parë u mbyll 0-0, ky fraksion prodhoi lojë të bukur e me ritëm.

Pjesa e dytë ishte disi me e vakët sa u takon rasteve në të dyja portat. Në 45-minutëshin e dytë, krutanët kryen edhe disa zëvendësime, pasi Çutra, Marku dhe Rrahim, i lanë vendin, Ymerajt, Atsinës dhe Shehit. Përpjekjet e krutanëve ishin të

shumta, por rezultati mbeti i bardhë 0-0, deri në vërshëllimën e fundit. Pak ditë më parë, Kastrioti u mund nga skuadra e AEL Limasolit me rezultatin 1-2. Edhe kundërshtari i djeshëm, Nea Selamina, luan në elitën e futbollit qipriot, ndaj barazimi mund të konsiderohet një rezultat pozitiv. Bujar Balliu