Osmani “çmend” vlonjatët, do 70 milionë lekë
Kuqezinjtë negociojnë me Teqjen, zbardhen prapaskenat
Tefik Osmani, kërkesë të "çmendur" për Fl amurtarin. "Panorama Sport" zbulon se mbrojtësi korçar u ka kërkuar drejtuesve të klubit 70 milionë lekë të vjetër në sezon për të firmosur me vlonjatët. Por, duket se në Vlorë nuk janë "çmendur" që të japin një shifër kaq të lartë për një mbrojtës, edhe pse Ilir Daja e ka kërkuar me insistim në skuadër. Kërkesa e lartë është pikërisht arsyeja që ende palët nuk kanë arritur akordin. Deri në këtë moment, as Osmani, por as drejtuesit e Flamurtarit nuk tërhiqen nga kërkesat e tyre. Qendërmbrojtësi kërkon që t'i plotësohet kushti i tij, ndërsa klubi e cilëson të ekzagjeruar shifrën. Drejtues të Flamurtarit i kanë kërkuar Osmanit të ulë çmimin, në një kohë që lojtari pret edhe një përgjigje nga presidenti Ardjan Takaj. Nuk është çudi që në një kohë që ende nuk ka firmosur as me Skënderbeun, Osmani të bëjë prapakthehu dhe të pranojë ofertën e vlonjatëve me të tjera parametra. Kjo gjë mbetet për t'u parë, por është fakt se deri më tani asnjë prej lojtarëve të Skënderbeut që u përfolën për të ardhur në Vlorë, nuk iu bashkëngjitën Ilir Dajës. Në klubin kuqezi kanë qenë të zhgënjyer nga mënyra se si kanë vepruar disa lojtarë që mbyllën sezonin në Korçë, pasi më parë i kanë dhënë fjalën Flamurtarit, e më pas kanë vijuar me Skënderbeun.
IRONIA - Dje Osmani ka thumbuar me një status në "Facebook", ndërsa nuk dihet destinacioni i shënjestrës. Korçari 33-vjeçar njihet për mesazhe ironike në rrjetet sociale, ku shpesh bën edhe "filozofin". Këtë herë ai ka folur për aktorë dhe regjisorë. "Njerëzit po besojnë atë që është në skenë duke folur. Duhet të dëgjojnë dhe (regjisorin) që është mbrapa skenës duke prit me fol", shkruan Osmani në "Facebook".
TEQJA - Në një kohë që Osmani përflitet prej kohësh në Vlorë, drejtuesit e Flamurtarit nuk kanë mbetur pa lëvizur. Ata kanë vijuar kontaktet me futbollistë të tjerë. Gazeta mëson se një prej tyre është Olsi Teqja. Flamurtari ka negociuar me lojtarin, aq më tepër që trajneri Ilir Daja e njeh mirë, pasi e ka pasur në kohën kur ishte në stolin e Tiranës. Qendërmbrojtësi mund të përshtatet edhe në rolin e shkatërruesit
në mesfushë. Në sezonin e fundit, Teqja ka luajtur te Shkëndija e Tetovës, ndërsa më parë ka qenë pjesë e Tiranës, Laçit, Bylisit, Apolonisë dhe Kastriotit. Nuk është çudi që lojtari të firmosë për Flamurtarin, ndërsa ka marrë ofertë edhe nga klubi i Kamzës.