Kamara dhe Bicaj nderojnë Shkëmbin ndaj ish-ekipit

Teuta-Liria e Prizrenit ishte sfida e dytë e trofeut "Pascucci", ndeshje e cila u dominua totalisht durrsakët. Ky ishte një takim i veçantë për trajnerin Bledi Shkëmbi dhe Florind Avdyli, pasi luanin ndaj skuadrës ku bënin pjesë në sezonin e fundit, Liria. Risia ishte se në këtë takim trajneri Shkëmbi hodhi në fushë një projeksion të formacionit titullar për sezonin e ri, ku Tefik Osmani ka mbajtur shiritin e kapitenit te "djemtë e detit". Teuta ishte superiore në këtë takim, ndërsa kosovarët dukeshin të pafuqishëm në fushë dhe vetëm në minutën e 41-të arrijnë të kryejnë gjuajtjen e parë në portën e Teutës. Të besuarit e Shkëmbit ishin më të qartë në lojën e tyre dhe që në minutën e 13-të, Avdyli shënon në portën e ish-skuadrës së tij, por gjyqtari e zhvlerëson golin, pasi futbollisti i Teutës kishte shkaktuar më parë faulle ndaj mbrojtësit Daci. Por nuk vonon dhe në minutën e 17- të, Kamara shënon me kokë golin e parë. Topi i harkuar nga këndi shkon te Bicaj, që me kokë e afron te porta. Gjuajtja e lezhjanit goditet po me kokë nga Kamara dhe, pasi përplaset në shtyllën pingule, kalon poshtë krahut të portierit dhe përfundon në rrjetë. 1-0 për Teutën. Teuta dominon totalisht, por te kosovarët ndikuan edhe ndërrimet e shumta që kreu trajneri Gjinali. Në minutën e 27-të, Avdyli nga këndi e dërgon topin në zonë, por portieri Salihi sapo hyn në fushë gabon në zotërimin e topit dhe Bicaj i ndodhur pranë e dërgon në rrjetë. 2-0 për Teutën. Pas këtij momenti, durrsakët krijojnë edhe disa raste të tjera shënimi, por Latif shpërdoron. Në minutën e 41-të vjen gjuajtja e parë e Lirisë në portën e Teutës, por topi i goditur me kokë nga Karahoda pritet nga portieri Isli Hidi. Në përfundim të kësaj ndeshjeje, ish-portieri i Kombëtares, Hidi, u shpreh: "Futbolli shqiptar është zhvilluar dhe ka ecur, kjo shikohet edhe nga paraqitjet e skuadrave shqiptare në Europë. Te Teuta besojmë se jemi një ekip që synojmë vendet e para në klasifikim. Ndeshje pas ndeshjeje do të konsolidohemi dhe shikoj se ekipi ka rritje. Dëshira dhe pasioni për futbollin nuk më ka mbaruar, ndaj me përgatitjen time besoj se do të luaj edhe disa vite në futbollin shqiptar".