Tomori firmos me një brazilian, priten të tjera afrime
Mbrojtësi shihet si përforcim cilësor për ekipin
Jean Rodrigo është loj tari më i ri brazilian në Kategorinë e Parë. Klubi i Tomorit ka zyrtarizuar marrëveshjen me mbrojtësin brazilian Jean Rodrigo, i cili prej disa ditësh kishte dalë në provë me skuadrën beratase. Rodrigo është aktivizuar në ligën e dytë braziliane, teksa shquhet për aftësi pozicionale dhe është tepër i fortë në dyluftimet me kundërshtarin. Tomori synon të tjera prurje cilësore këtë merkato. Drejtuesit më të lartë të klubit kanë garantuar se do të krijojnë
një skuadër të konsoliduar, në mënyrë që ngjitja në Kategorinë Superiore të bëhet më e lehtë. Kryetari i Bashkisë së Beratit, Petrit Sinaj, që është edhe presidenti i klubit me aksione të plota, të cilat i zotëron institucioni që ai udhëheq, duket se tashmë i ka marrë vetë në dorë "frenat" e merkatos dhe po
punon për të sjellë në Berat futbollistë me kualitet. Për "Panorama Sport", drejtuesit e klubit u shprehën se çdo gjë po studiohet me kujdes dhe objektivi i vetëm është "top 10-shja" e ekipeve elitare. Sipas tyre, po punohet me intensitet dhe po shikohet çdo pistë të mundshme, në mënyrë që brenda muajit, Tomori të ketë një ekip të konsoliduar dhe pretendente kryesore për t'u ngjitur në elitë. Deri në këto çaste janë zyrtarizuar vetëm disa prej futbollistëve që e meritojnë të jenë pjesë e këtij projekti, pasi për një vend në Superiore do të jetë një garë e ashpër dhe nevojiten futbollistë dinjitozë dhe me eksperiencë. Në Berat, deri tani kanë siguruar shërbimet e futbollistëve: Kaloshi, Çaço, Koleci, Ahmetaj, Kingsley, Friday dhe Rodrigo, dhe kjo i bën drejtuesit të jenë më të sigurtë. Futbollistët e mësipërm janë më të mirët në këtë kategori dhe gjithçka do të shikohet në fillimin e kampionatit.
ILIR GJYLA