Lushnja dhe Egnatia ndalen te barazimi
Lushnja dhe Egnatia barazuan 1- 1, në një ndeshje testuese në stadiumin "Roza Haxhiu". Gjyla i Lushnjës pa brazilianin Xheferson dhe i mjaftuan 24 minuta për të kuptuar se nuk vlen për verdhejeshilët, ndërsa për Gjonin, braziliani Jagu do të mbetet në provë tek Egnatia. Sulkja dhe Allkanjari u stërvitën veçmas dhe nuk u aktivizuan. Ndërsa, sulmi i Egnatias Canka-Agastra është në infermieri pas dëmtimeve në miqësoren me Partizanin. Për kronikë Egnatia kaloi në avantazh me nigerianin Ezike, i cili shfrytëzoi mjaft mirë një dalje të pastudiuar të portierit Arjol Kaloshi. 11 minuta më vonë, lushnjarët barazuan me anë të 19-vjeçarit Rediol Ademi, i cili shfrytëzoi një pasim të bukur me kokë të marrë nga Fejzaj. Kthesa e bukur me të majtën befasoi Ademin. Çudia në "Roza Haxhiu" ishte se tribuna qendrore ishte gati 80 për qind e mbushur me spektatorë, ndërsa një grup ultrasish u vendosën në pjesën jugore të stadiumit. Lushnja mund të kishte fituar miqësoren me fqinjët, por goditja e Alushit në minutën e 75- të gjeti traun e portës së Ajazit. Sefa ka qenë disa herë pranë golit, ndërsa nga ana tjetër Bejte vendosi shpejt sigurinë në portën lushnjare. Duke vënë në punë eksperiencën, portieri lushnjar bëri disa ndërhyrje të mira, sidomos në një kthesë të Dimos.
GJONI- Trajneri i Egnatias, Vladimir Gjoni, ish-sulmuesi i skuadrës së Lushnjës në sezonin 2002- 2003 në konferencën për shtyp tha se skuadra e tij po funksionon më së miri. "Kemi pothuajse tri javë që
stërvitemi. Pavarësisht se të dyja skuadrat janë të ngarkuara normalisht, por dua të them se ajo që është kryesorja skuadra funksionon në mënyrë perfekte. Jam super i kënaqur. Duhet të qëndrojmë me "këmbë në tokë". Në pjesën e parë nuk e prisja që Lushnja të luante me
lojtarë të rinj. Në pjesën e dytë çdo gjë shkoi perfekt. Më datën 17 gusht do të zhvendosemi në Pogradec. Na kanë krijuar të gjitha kushtet për të bërë një stërvitje normale. Gjithsesi, më kryesorja është se përgjigjja e skuadrës është pozitive", mbylli Gjoni. Alban Alushi