Besa dhe Orikumi, si një lojë penalltish
Në miqësoren mes Besës dhe Orikumit nuk ka fitues. Besa dhe ekipi i Orikumit, ekipe që janë duke zhvilluar fazën e tyre përgatitore në Pogradec. Duke përfituar nga ky fakt kishin planifikuar edhe një takim miqësor, që në fakt nuk është i pari për to. Orikumi ka luajtur me Pogradecin dhe Besa me Skënderbeun. Kishte pritshmëri më të larta ky takim, por realiteti foli ndryshe. Në pjesën e parë ka qenë një ndeshje me një nivel shumë të ulët, aq sa të dy ekipet e kishin shumë të vështirë të bënin vizita serioze në portat kundërshtare. Edhe pse topi qarkullohej në mesfushë, gabimet ishin të dukshme nga të dyja ekipet. Madje, futbollistët nuk kishin freski për të vrapuar, kjo e justifikuar nga të dy trajnerët me ngarkesën e madhe fizike që kanë marrë në këto momente. Pjesa e dytë fillon diçka më ndryshe, kjo edhe për atë se janë shënuar gola, por edhe këto kanë ardhur nga pika e bardhë e penalltisë. Së pari, është Sadushi për ekipin e Orikumit, që pengohet në mënyrë të gabuar nga një mbrojtës i Besës dhe nga pika e bardhë e penalltisë, Dhrami që gjuan saktë dhe kalon të tijtë në avantazh. Pas këtij momenti është Besa më kërkuese dhe Mihani është ai që jep sinjalin e parë kur godet edhe shtyllën pingule. Në minutën e 70-të, janë futbollistët kavajas, të cilët i besojnë Krasniqit të ekzekutojë penalltinë e fituar po nga vetë ai dhe rezultati kthehet i barabartë 1-1. Më pas, ritmi i lojës ulet shumë, ndërsa trajnerët nisin zëvendësimet, derisa sfida mbyllet me rezultatin e barabartë 1-1. Pas kësaj miqësoreje, dy ekipet pritet të kenë të tjera miqësore në Pogradec, deri në fund të fazës përgatitore. Në fund të takimit, trajneri i Orikumit, Artan Sakaj, do të fliste për miqësoren e djeshme. "Jam i kënaqur nga kjo miqësore. Kemi në ekip futbollistë me përvojë dhe kjo do të na ndihmojë për të ecur më të sigurt. Duhet të thyejmë mentalitetin se vijmë nga një kategori më poshtë. Kjo është shumë e rëndësishme dhe duhet të fitojmë sa më shpejt besim te vetja për të guxuar më shumë në çdo takim, pavarësisht kundërshtarit që kemi ose do të kemi përballë", mbylli Sakaj. Romeo Xinxifi GOLAT: Dhrami 60' (11-m) / Krasniqi 70'(11-m) ORIKUMI: Halili, Gjinaj, Hoxha, Kuçi, Meta, Kuqi, Nurçe, Çapoj, Çaushaj, Livanaj, Dhrami. ( U aktivizuan: Muho, Azizaj, Kondi, Skrapalliu, Kapo, Metaj, Llojaj, Kongjoni, Seferi, Sadushi). Trajner: A.Sakaj.
BESA: Aka, Perja, Biba, Memini, Saluani, Mihani, Mllugja, Thaçi, Cara, Çekici, Berisha. ( U aktivizuan: Duka, Bushi, Hoxha, Zhava, Brahimaj, Meçe, Deliu, Krasniqi, Kola).
Trajner: G:Begeja Gentian Begeja, trajneri i Besës në fund të miqësores së djeshme foli për ekipin e tij: "Mund të them se na duhet shumë punë për të arritur atje ku janë edhe pritshmëritë tona. Duhet të pranojmë se jemi shumë të ngarkuar nga ana fizike. Kjo është normale. Ka disa futbollistë, për të cilët pres edhe më shumë. Shikoj që ekipi ka nevojë për dy ose tre përforcime dhe besoj se do të marrim lojtarët e duhur deri në fund të merkatos. Duhet të arrijmë sa më shpejt tek ajo që presim".