“Janë ndeshje delikate, ka rrezik për lojtarët”

Pep Guardiola i trembet shumë startit të sezonit, pavarësisht se e nisi mjaft mirë duke fituar ndeshjen e parë ndaj Arsenalit. Në deklaratën e tij përpara sfidës së dytë me Hadërsfilldin thotë se ky moment është shumë i vështirë për skuadrat, por mbi të gjitha për lojtarët që vijnë nga një periudhë pushimesh dhe rrezikojnë dëmtimet. Ndeshja- Trajneri kampion i Anglisë parashikon një tjetër sfidë të vështirë, ashtu si një vit më parë ndaj Hadërsfilldit dhe nuk e konsideron të fituar në tavolinë. "Sezonin e kaluar ishte shumë e vështirë kjo ndeshje. Rivalët tanë mbrohen mjaft mirë. Janë të fortë, fizikisht, në aspektin difensiv dhe shumë të fortë, të ndëshkojnë me kundërsulme dhe me presing. Imagjinoj që do të ndodhë e njëjta gjë edhe këtë vit", tha fillimisht trajneri i Sitit.

Frika- Guardiola gjithashtu ka frikë nga dëmtimi i lojtarëve, por edhe nga ndonjë surprizë e pakëndshme në këtë ndeshje, duke thënë se skuadrat që kanë pasur shumë futbollistë në Botëror nuk e kanë të lehtë të gjejnë ekuilibrat. "Këto lloj ndeshjesh janë shumë të rrezikshme për lojtarët. Ekipe si ky i sotmi, si Volvesi, Kardifi dhe Fulhami preferoj që t'i kem përballë në tetor ose nëntor. Ekipet e mëdha humbasin gjithmonë pikë ndaj këtyre skuadrave të vogla. Për më tepër, kur skuadrat që kanë pasur lojtarë në Botëror nuk e kanë të lehtë që të gjejnë ekuilibrat. Por, Siti ka punuar shumë gjatë kësaj kohe dhe shpresoj që të shprehemi mirë në fushën e lojës", ka thënë Guardiola në konferencë.