Mungon Hila, shansi i Kotes për të qenë nesër titullar

Trashit i hiqet pezullimi, në fushë ndaj Kamzës

Partizani ia ka hequr pezullimin Lorenc Trashit dhe kështu që 26vjeçari pritet të jetë titullar ndaj Kamzës. Por edhe me rikthimin e Trashit, ekipi sërish nuk do të jetë i plotë, pasi për herë të parë të kuqtë do të vuajnë këtë sezon pezullimin nga kartonët. Ardit Hila, me ndëshkimin ndaj Skënderbeut, ka plotësuar numrin katër të kartonëve të verdhë, kështu që elbasanasi mungon ndaj kamzalinjve. Gjasat janë që të vend të Hilës të luajë Kristi Kote, që së bashku me Telushin mund të formojnë dyshen e qendrës së mesfushës. Gjithsesi, akoma nuk është vendosur sesi mund të luajë Partizani ndaj Kamzës, pasi stafi ka disa opsione për ta ndërtuar formacionin e mundshëm. Bazuar te formacioni tip, i bie që Trashi, pas rikthimit, të pozicionohet si mbrojtës i majtë dhe Hilën ta zëvendësojë Kote. Por, në qendër të mesfushës mund të luajë edhe Mala, rol të cilin e ka bërë shpesh në sezonin e shkuar duke krijuar kështu mundësi aktivizimi në krahë për Çinarin. Ekziston edhe një variant që koreani sot të luajë mbrojtës i majtë dhe Trashi të avancojë përpara në këtë krah dhe Mala të luajnë në qendër në vend të Hilës. Por do të jetë seanca e fundit ajo që do t'u japë zgjidhje këtyre kombinacioneve të përmendura nga lart. Pavarësisht se cilët do të jenë lojtarët që do të zbresin në fushë nga minuta e parë, nga të kuqtë kërkohet të bëhet menjëherë autokritika e humbjes me Skënderbeun. Ndaj, fitorja me Kamzën është e vetmja mundësi që të realizohet ky mision. Praktikisht duket mision i realizueshëm, por edhe në fazën e parë të kuqtë morën një fitore me fat në fushën e Kamzës.