Bushi: Më kujton Mingën, cilësitë e Durmishajt i mungojnë Shqipërisë
Trajneri aktual i Kombëtares Shpresa shpjegon karakteristikat e Durmishajt. Sipas Alban Bushit, ai është një nga futbollistët me shumë të ardhme. Për "Panorama Sport", trajneri i Kombëtares Shpresa flet edhe për çështjen e shërbimit ushtarak që duhet të kryejë sulmuesi shqiptar. "Durmishajn e kam ndjekur dhe pikë së pari them që ka qenë mungesa jonë më e madhe në kualifikueset e fundit të ekipit Shpresa. E kemi pasur në vetëm dy ndeshje dhe për këtë ndihem i keqardhur, pasi kontributi i tij na ka munguar shumë në fazën sulmuese. Durmishaj ka si specifikë të tijën fizikun. Është një lojtar shumë i fortë dhe me karakteristikat që ka është i veçantë. Për këtë, mendoj se do të jetë shumë i domosdoshëm në vazhdimësi për Shqipërinë, pasi për momentin mungon një sulmues i tillë. Sipas meje, Durmishaj, Vrioni dhe Manaj, janë tre sulmues nga të cilët pritet shumë", shprehet fillimisht Bushi.
Rreziku grek - Mediat greke raportojnë gjithnjë e më shumë një interesim të kombëtares helene për shërbimet e 21-vjeçarit. Rreth kësaj çështjeje, Bushi tregon se shanset për largim ekzistojnë. "Jo vetëm për futbollistin në fjalë, por për cilindo lojtar, mendoj se nuk ka shumë për të bërë as federata shqiptare dhe as ajo greke. Kjo, për faktin e thjeshtë se është dëshira e vetë lojtarit që vendos se cilën përfaqësuese do të zgjedhë. Unë personalisht po flas si Alban dhe jo si zyrtar, mendoj që zgjedhja e tij do të jetë Shqipëria. Durmishaj ka luajtur prej shumë kohësh me skuadrat tona përfaqësuese dhe ndihet i vlerësuar dhe po e përsëris që do të jetë i domosdoshëm në Kombëtaren shqiptare në të ardhmen, pasi mungon një 'numër 9' me karakteristikat e tij. Mua ai sulmues më kujton të ndjerin Arben Minga për çfarë shfaq në fushë. Sipas meje, çdo shqiptar duhet të luajë për Shqipërinë, pavarësisht problemeve që hasin në shtetin ku jetojnë", shprehet më tej Bushi.
Shërbimi ushtarak - Në grumbullimin e fundit të Kombëtares Shpresa, Durmishaj mungoi pikërisht prej çështjes së shërbimit ushtarak. "Na informuan se Durmishaj nuk mund të vinte, për shkak të shërbimit ushtarak. Një procedurë e detyrueshme për cilindo që ka një pasaportë greke. Na u komunikua në atë periudhë që ishte zgjedhur fiks koha e përfaqësueseve për t'u paraqitur dhe na u tha se për afro 3 muaj ai nuk mund të dalë jashtë kufijve të Greqisë. Më tej nuk kam shumë informacione", vijoi trajneri i Kombëtares U-21.
Kampionati grek - Bushi ka shpjeguar edhe përshtatjen e Durmishajt në kampionatin grek. "Në letër duket se kampionati grek është i lehtë. E kjo shpesh thuhet referuar faktit që mungojnë mbrojtësit modernë si në Itali apo kampionate të tjera, por nuk është e vërtetë. Në Greqi, mbrojtësit janë shumë të ashpër. Edhe në kohën kur luaja unë, golashënuesi i Olimpiakosit e mbyllte me 12 apo 13 gola. Ndërsa Durmishajn e kam parë të përshtatet mirë, të jetë lojtar kryesor në ekipin e tij dhe t'i udhëheqë. Bullari? Është një tjetër emër që mbahet në konsideratë të lartë nga Drejtoria e Ekipeve Kombëtare. Po bën mirë dhe po rritet në vazhdimësi", ka deklaruar Alban Bushi për "Panorama Sport".