Leksion nga Kosova, përfaqësuesja e 17-vjeçarëve kualifikim historik

"Elite Round"/ Dy fitore, lanë pas Skocinë dhe Zvicrën

Punë, strategji dhe në fund rezultate. Në Kosovë skuadrat përfaqësuese po ecin me hapa gjigantë drejt suksesit. Shpesh shumë talente tregojnë vlerat në këto ekipe dhe vazhdimisht po vërehen rezultate pozitive në secilën prej përfaqësueseve të Kosovës. Shembulli më i fundit për Shqipërinë? Pikërisht nga Kosova. 17-vjeçarët e saj kanë arritur të dalin të parët në grupin kualifikues.

Historike - Një rezultat i shkëlqyer nga 17-vjeçarët në Kosovë, të cilët me dy fitore dhe një humbje kanë fituar grupin duke lënë pas kundërshtarë si Skocia dhe Zvicra. Fitorja e djeshme me Qipron ka mjaftuar që "dardanët" e vegjël të arkivojnë një rezultat historik, i cili u jep mundësinë që të kalojnë në fazën tjetër. Një gol i Milot Avdylit në minutën e 63-të mjaftoi për të marrë tri pikë të arta që i mjaftuan Kosovës për të shkuar në kuotën e gjashtë pikëve. Takimi tjetër mes Zvicrës dhe Skocisë u ka shkuar gjithashtu për shtat "dardanëve", teksa barazimi mes tyre ka bërë që Kosova të jetë e vetme në krye të grupit të pestë kualifikues. Në fundin e takimit, Kosova ka mbetur me dhjetë vetë, pasi Marmullaku është ndëshkuar me dy kartonë të verdhë, e për pasojë me të kuq. Për 17-vjeçarët kosovarë kjo ishte hera e dytë që merrnin pjesë në kualifikuese, ndërkohë që arritën të sigurojnë kualifikimin në "Elite Round" për Europianin 2019. Një leksion i qartë pune dhe suksesi për Shqipërinë, kombëtaret e së cilës në të gjitha nivelet dështuan në kualifikueset e këtij sezoni, disa pa shënuar asnjë gol, e të tjera me humbje tenistike të turpshme.