Hysenagolli dhe Lasku, ish-ët që sfidojnë Tiranën
Dy basketbollistët, përballë ekipit ku janë rritur
Teuta dhe Tirana do të përballen sot për javën e 5-të të Superligës së basketbollit për meshkuj. Një ndeshje e veçantë për vetë faktin që vendosen përballë dy skuadrat që rivalizuan njëra-tjetrën për trofetë kombëtarë në vitin e kaluar. Kjo sfidë do të jetë speciale edhe për dy lojtarët e Teutës, Endrit Hysenagollin dhe Gent Laskun, të cilët kanë luajtur për vite me radhë me bardheblutë kryeqytetas dhe në merkaton e këtij viti janë transferuar në radhët e ekipit bregdetar. Të dy basketbollistët janë kontaktuar nga "Panorama Sport" dhe kanë dhënë opinionin e tyre rreth kësaj ndeshjeje dhe rreth eksperiencës së tyre të re në kampin e "djemve të detit".
HYSENAGOLLI - Hysenagolli e komentoi kështu aventurën e tij në këto muaj të parë me Teutën: "Çdo gjë po shkon shumë mirë, ku fitoret e fundit në Ballkan Ligë apo dhe fitorja kundër Goga Basket kanë qenë ndeshje shumë të bukura nga ana e skuadrës sonë. Suksesi i arritur në Ballkan Ligë në dy takimet e para ishte disi i veçantë, pasi të them të drejtën nuk është se e prisja 100% diçka të tillë, duke qenë se ishin sfida të forta me kundërshtarë të një niveli të mirë. Deri tani çdo gjë po shkon mirë dhe jemi plotësisht brenda objektivave. Jemi të parët në grup në Ligën Ballkanike, edhe pse është ende herët për të bërë parashikime, por futja në zonën 'playoff', është objektivi i parë për sa i përket eventit ndërkombëtar". Më pas shtatlarti kryeqytetas flet për ndeshjen që e pret ndaj ish-ekipit të tij: "Është diçka shumë e bukur dhe shumë emocionuese, pasi do të luaj kundër ekipit ku jam rritur dhe kundër të gjithë shokëve të mi. Të shikojmë nesër (sot) sesi do të shkojë". Hysenagolli deklaron gjithashtu edhe se cilat janë rivalet e skuadrës së tij në këtë kampionat: "Si rivale të Teutës shikoj dy apo tri skuadra, të cilat janë Partizani, Tirana dhe Goga Basket", tha lojtari i skuadrës durrsake.
LASKU - Një tjetër ish që ka kaluar nga Tirana në radhët e Teutës është Gent Lasku. 33-vjeçari e komenton kështu fillim e sezonit në skuadrën e tij të re: "Ky fillimsezoni ka qenë më pozitiv sesa unë personalisht e prisja. Në ekip ka harmoni dhe arritëm të kuptohemi shumë shpejt me njëri-tjetrin. Patëm edhe disi fat, pasi u bekuam me fitore si në Ballkan Ligë apo edhe në kampionat. Mosha e re e lojtarëve të ekipit ka ndikuar në këtë ecuri pozitive, pasi lojtarët kanë arritur të përshtaten menjëherë me udhëzimet apo direktivat
e stafit teknik dhe janë treguar shumë të bindur në të gjitha aspektet. Gjithashtu, ka ndikuar në këto rezultate edhe përvoja e lojtarëve me eksperiencë që ka Teuta. Trajtimi që kemi pasur nga stafi teknik ka qenë një ndihmesë e madhe për ne". Lasku shprehet edhe për ndeshjen ndaj Tiranës, ekipit ku ka kontribuar për vite me radhë: "Tirana është një skuadër e veçantë për mua, pasi ky ekip ka një domethënie specifike në historinë e karrierës sime. Megjithatë, mendoj që nuk do të kem asnjë problem ashtu si e gjithë pjesa tjetër e ekipit për të shfaqur më të
mirën. Unë tashmë jam një lojtar i Teutës dhe do të sillem në mënyrën më profesionale të mundshme". Në fund, Lasku flet për objektivat e "djemve të detit" në këtë sezon: "Objektivat tona janë shumë të qarta në kompeticionet kombëtare, ku do të kërkojmë të fitojmë gjithçka, si kampionatin, kupën dhe superkupën. Ndërsa për sa u përket objektivave ndërkombëtare, fillimisht do të kërkojmë të kalojmë raundin e parë dhe më pas të shikojmë se ku mund të arrijmë.
Kemi bërë 4 ndeshje për 9 ditë përpara sfidës me Tiranën dhe kemi shpenzuar shumë
energji, ku tre lojtarë nga ne, si unë, Hysenagolli dhe Kopes kemi luajtur mesatarisht mbi 30 minuta për ndeshje, çka bën që dhe konsumi i energjive të jetë goxha i lartë. Ndërkohë që mbas tri ditësh nga ndeshja me Tiranën na pret ndeshja ndaj Kozuv në Maqedoni dhe kalendari është shumë i ngarkuar, por shpresojmë të kemi edhe pak fat për sa u përket dëmtimeve", përfundon Lasku. Përveç sfidës ndërmjet Teutës dhe Tiranës, sot do të zhvillohet edhe ndeshja KamzaGoga, ndërsa java e pestë do të mbyllet me takimin e nesërm Vllaznia- Partizani.