Nga Vinicius tek Asension, si e ndryshoi Solari Realin
I përkohshëm rilindi stilin sulmues të madrilenëve
Mjaftoi një ndeshje kupe kundër një ekipi "amator" si Melila, por të fituar me 4 gola, që në Spanjë të nisin menjëherë krahasimet mes debutimit të trajnerit të të rinjve, Santiago Solari, dhe të shkarkuarit Hulen Lopetegui. Ndonëse ky krahasim nuk mund të qëndrojë totalisht, duke parë edhe rivalin e dobët, gjithsesi ishte dëshira e ofruar nga skuadra e Realit në kupë ajo që bëri të nisë një "hetim" në lidhje me ndryshimet e bëra nga Solari, të cilat ndoshta mund të shërbejnë edhe të shtunën ndaj Vajadolidit. Vinicius... - Ndryshimi më i madh quhet Vinicius, sepse më në fund braziliani i talentuar e pati një shans dhe e shfrytëzoi. Pas ndeshjes u fol më shumë për të sesa për fitoren e Realit, sepse ai dha pasim për gol, i shkoi pranë realizimit personal dhe zbaviti me lojën e tij, atë që dëshiron tifozëria e Realit. Vinicius ka talent dhe është nga ata lojtarë që mbushin stadiumet, edhe pse është ende larg të qenit një lojtar i kompletuar, ndoshta sa për të qenë titullar fiks i skuadrës në La Liga dhe Champions. Asensio, "9 fals" - Marko Asensio, ose më saktë pozicioni i tij i ri, ishte një ndër risitë e Realit në Melila. Këtë radhë, Asensio luajti në qendër të sulmit, Vinicius dhe Benzema luanin në anësore. Më i lirë dhe më i rrezikshëm, Asensio konfirmoi jo vetëm me golin, por edhe me paraqitjen e tij se ndoshta talenti spanjoll ishte një nga mëkatet më të mëdha të trajnerit Lopetegui, që e shihte thjesht si rezervë. Zgjohet Odriozola - Te Reali qajnë Karvahalin pas dëmtimit të tij, por në Melila Odriozola ishte një "shigjetë" e pakapshme në korsinë e djathtë. Shumë efektiv në fazën sulmuese, më në fund blerja e madhe e verës madrilene tregoi për herë të parë se mund të luajë titullar dhe të garantojë cilësi në fushë.
Të rinjtë duan besim - Sançez dhe Kristo ishin dy lojtarët e marrë nga të rinjtë që debutuan në Melilla. Solari i njeh mirë, i ka drejtuar vetë deri para pak ditësh dhe sidomos Sançez u duk një lojtar interesant. Duke parë që Vajeho e Varan janë të dëmtuar, Sançez mund të jetë një garanci në qendër të mbrojtjes.