Shirat shtyjnë Superklasiken për sot në orën 20:00

Shirat e fortë që ranë mëngjesin e djeshëm në kryeqytetin e Argjentinës shtynë finalen e parë të Kupës Libertadores mes Boka Juniorsit dhe River Plejtit, planifikuar për t'u zhvilluar mbrëmë në orën 21:00 në "Bombonera". Derbi i Buenos Airesit do të luhet ditën e sotme në orën 20:00 me orën tonë.

SHTYRJA - Terreni i stadiumit të Bokas u shndërrua në një pishinë në vende të caktuara (ra 95 mm shi mbi fushë, më shumë seç parashikohet të bjerë në pjesën e mbetur të vitit) dhe sipas organizatorëve, sistemi i drenazhimit nuk arriti që të normalizonte situatën me shirat, ndërkohë që ekzistonte edhe rreziku i një stuhie të fortë elektrike, e cila mund të rrezikonte jetët e publikut dhe lojtarëve. Fillimisht ndeshja u konfirmua, edhe pse gjatë gjithë ditës Buenos Airesi pati shumë probleme si me qarkullimin, ashtu edhe me ndërprerjet e shpeshta të energjisë elektrike. Por funksionarët e "Conmebol" kërkuan edhe një inspektim të fundit. Në orën 19:28, kur lojtarët e Bokas sapo ishin ngjitur në bordin e autobusit dhe po linin hotelin, erdhi edhe cicërima në "Twitter" nga "Conmebol": "Takimi luhet nesër në orën 16:00", ose 20:00 me orën tonë. Dhe pritja ia vlen për thrillerin që pritet të shijojnë tifozët për Superklasiken më të rëndësishme të historisë.