Favre: Ndeshje e çmendur, s'jemi ende favoritë
Lusien Favre nuk e pranon petkun e skuadrës favorite dhe e shmang atë me elegancë, edhe pse Dortmundi i tij e konsolidoi kreun pas triumfit përballë rivalëve direkt. "Ishte një ndeshje e çmendur. Bajerni e nisi fort. Ne e humbëm menjëherë topin falë presingut të Bajernit. Por unë kisha ndjesinë se ata nuk do vazhdonin ta ruanin ritmin e 30 minutave të para. Në pjesën e parë ishim me fat që shkuam në dhomat e zhveshjes në disavantazh vetëm të një goli. Rojs mund ta kishte shënuar golin e barazimit 2- 2 më herët, por ai nuk e humbi qetësinë dhe arriti të shënojë përsëri. Edhe psikologjikisht reaguam në mënyrë fantastike", tha tekniku zviceran. Në lidhje me temën e titullit dhe diferencën e 7 pikëve përpara Bajernit, Favre komentoi: "Ne duhet të korrigjojmë ende shumë gjëra, si për shembull çështjen e kundërsulmeve. Ka ende shumë për t'u përmirësuar". Por ai ka një armë shumë të fortë, stolin. Dortmundi ka shënuar 18 gola me lojtarët që kanë ardhur nga pankina këtë sezon në të gjitha kompeticionet dhe ato janë 10 më shumë se çdo skuadër tjetër në 5 kampionatet kryesore të Europës.