Kroati Plantek, trajneri i ri i Vllaznisë

Me afrimin e presidentit të ri, Alban Xhaferi, i cili do të marrë vendin e presidentit Sokol Dibra, skuadra shkodrane ka nisur menjëherë lëvizjet e para. Do të jetë trajneri kroat, Nevan Plantak ai që do marrë drejtimin e kuqebluve. Plantak është një teknik me eksperiencë të madhe ku ka drejtuar skuadrat: Alkara, Zadar, Borik Puntamika, Jazine, Slavonski Brod në Kroaci. Gjithashtu ka drejtuar në Bosnjë Hercegovinë ekipet Shiroki dhe Posusje. Në Sllovaki ka punuar me skuadrat Komarno dhe Handlova. Trajneri kroat ka pasur një eksperiencë të suksesshme dhe në kampionatin kosovar ku është shpallur kampion me skuadrën e Trepçës. Duke nisur nga java e ardhshme, Plantak do të marrë drejtimin e skuadrës dhe objektivi primar është shpëtimi nga rënia e kategorisë, pasi Vllaznia po kalon një periudhë mjaft të errët dhe ndodhet në fund të renditjes me gjashtë humbje në gjashtë javët e para të kampionatit. Megjithatë, me afrimin e presidentit të ri dhe të trajnerit kroat duket se në Shkodër diçka po lëviz dhe sigurisht që kuqeblutë do të ndërhyjnë edhe në merkato, ku do të synohet sa më parë përforcimi i ekipit.