Veriorët rikthehen në stadiumin “Zeqir Ymeri”

Klubi i Kukësit, nëpërmjet një njoftimi në rrjetet sociale, bën me dije të gjithë tifozët se në datën 16 nëntor, ora 14:00, si pasojë edhe e pushimit prej pauzës së Kombëtareve, do të zhvillojë një takim miqësor me Lirinë e Prizrenit, klub me të cilin kanë miqësi dhe janë në faza binjakëzimi. Ky takim miqësor do të zhvillohet në stadiumin “Zeqir Ymeri”, si për të qenë më pranë tifozëve kuksianë, në këtë sezon ku verilindorët i luajnë edhe ndeshjet si pritës, në fushë asnjanëse, pasi stadiumi në Kukës nuk është licencuar nga FSHF, dhe po i nënshtrohet rikonstruksionit. Sakaq, tekniku Cungu ka lënë dy ditë pushim ekipin. Më poshtë, njoftimi i plotë. “Skuadra e Futboll Klub Kukësit, më datë 16 nëntor 2018 ora 14:00, do të zhvillojë ndeshje miqësore me skuadrën e Lirisë së Prizrenit. Rreth një vit më parë, në ndeshjen e parë miqësore Liria e Prizrenit– Kukësi, këta dy ekipe u ndanë në barazim ku skuadrat arritën të shënonin nga 3 gola. Rikthehemi pas një periudhe të gjatë në “Zeqir Ymeri” dhe ju bëjmë thirrje të gjithë sportdashësve, në veçanti tifozëve kuksianë, të mbështesin skuadrën e zemrës, pasi hyrja në stadium do të jetë pa pagesë. Shpresojmë që shumë shpejt të arrijmë të zhvillojmë të gjitha ndeshjet e Kategorisë Superiore, Kupës së Shqipërisë si dhe ato të arenës ndërkombëtare në stadiumin e qytetit tonë, pasi deri tani ka ndikuar shumë negativisht në vazhdimësinë e ekipit, duke mos ju dhënë tifozëve mundësinë e mbështetjes së drejtpërdrejtë për skuadrën”. S. Sulozeqi