Klipers thyejnë kampionët në shtesë

Golden Stejt vuan mungesën e Stefen Kërrit, pëson humbjen e tretë sezonale

Klipers vazhdojnë të befasojnë në NBA, ku këtë herë kanë arritur t'i rrëmbejnë fitoren pas kohës shtesë kampionëve në fuqi të Golden Stejt me rezultatin 121-116 (koha e rregullt përfundoi 106-106), falë Lu Uilliams, i cili ishte protagonist absolut i ndeshjes me 25 pikë decizive të realizuara ndaj "Warriors". Italiani Galinari e bëri më së miri detyrën e tij në mbrojtje për skuadrën nga Los Anxhelosi. Ndërkohë, Golden Stejt vuan mungesën e Kërrit, i cili vijon të mungojë për shkak të një problemi muskulor, ku në sfidën ndaj Klipers u zëvendësua nga Kuin Kok. Vendësit kishin edhe ata mungesat e tyre të rëndësishme për këtë sfidë ku nuk ishin të padisponueshëm Bradlej, Mbah dhe Moute. Të luash kundër kampionëve, duhet patjetër të mbash një ritëm të lartë gjatë gjithë kohës dhe këtë gjë vendësit e realizuan shumë mirë, me italianin Galinari që edhe pse me bërrylin e fashuar tregoi një formë shumë të mirë, duke i dhënë një ndihmesë të madhe skuadrës së tij, sidomos në fazën mbrojtëse. Momenti deciziv i ndeshjes është atëherë kur Durant braktis parketin pas plotësimit të numrit të faulleve dhe këtu shfaqet në skenë Lou Uilliams, i cili deri në ato çaste kishte zhvilluar një lojë me oshilacione. Ai realizon 10 pikë vendimtare në minutat e fundit, duke mos gabuar asgjë dhe duke i dhuruar triumfin ekipit të tij ndaj kampionëve. Për Golden Stejt më i miri ishte Durant me 33 pikë, 11 rikuperime në tabelë dhe 10 asistime. Humbet skuadra e San Antonio, që u mund 10499 nga Sakramento, sfidë në përgjithësi e ekuilibruar, por vendësit u shkëputën në fund dhe triumfuan falë 22 pikëve të Bogdanoviç. Dallas mposhti 103-99 Çikagon, ndeshje e luajtur në fushën e këtyre të fundit. LaVin me 26 pikë ishte shënuesi më i mirë i ndeshjes, por që nuk mjaftuan për të evituar humbjen e "demave", ndërsa për skuadrën nga Teksasi u dallua Barnes me 23 pikë. Fitorja e nëntë sezonale për Filadelfian,

që triumfoi 124-114 ndaj Majemit, takim i dominuar nga miqtë, të karikuar edhe nga lajmi i transferimit të Butler, i cili nuk luajti në këtë sfidë. Më i miri në parket ishte Embid me 35 pikë e 18 rikuperime në tabelë, i cili pati edhe mbështetjen e Redik me 25 pikë. Rikthehet te fitorja skuadra e Oklahomës, e cila mposhti me rezultatin 118101 Feniks, me Xorxh në një formë të shkëlqyer (32 pikë të realizuara). Ndërkohë, Minesota fitoi me shifrat 120-113 ndaj Bruklin, falë 25 pikëve e 21 kërcimeve në tabelë nga Touns.