Higuain dënohet 2 ndeshje, Milani do t’ia kthejë Juves

Gjendja e sulmuesit, mund të mos ushtrohet e drejta e blerjes

Higuain ka marrë një pezullim prej 2 ndeshjesh pas kartonit të kuq të marrë në takimin kundër Juventusit. Argjentinasi ka shpërthyer ndaj arbitrit të ndeshjes dhe ky i fundit i ka treguar kartonin e kuq. Për pasojë të sjelljes së tij, argjentinasi do të mungojë kundër Lacios dhe Parmës. Në motivimin e Komisionit Italian të Disiplinës, vendimi për të sanksionuar bomberin e Milanit, motivohej me faktin: “Ka protestuar ndaj drejtuesve të garës, ka shfaqur një sjellje të pasjellshme ndaj arbitrit kryesor, ndaj të cilit është afruar kërcënueshëm në minutën e 83-të të ndeshjes Milan– Juventus. Futbollisti ka protestuar haptazi dhe ka shfaqur nervozizëm deri në momentin që është larguar plotësisht nga fusha”.

APELIM - Me lojtarin që ankohet se nuk mbrohet nga arbitrat, në krah të tij ka dalë klubi. Drejtuesit e Milanit nuk kanë ndenjur duarkryq në këtë situatë dhe kanë vendosur të paraqesin menjëherë apelimin e tyre kundër vendimit nga federata. Drejtuesit kuqezinj do të kërkojnë që dënimi i sulmuesit të shkurtohet me 1 ndeshje dhe “El Pipita” të mungojë vetëm në takimin kundër Lacios. Pikërisht, bardhekaltrit kanë “frymëzuar” avokatët e “Djallit”, sepse ka qenë një dënim i vitit të kaluar i Imobiles, i cili nga dy javë ka parë t’i ulet dënimi në një të vetme. Ky precedent thuhet se do të përdoret nga kuqezinjtë për të marrë një lehtësim të sanksionit për argjentinasin, aq më tepër që pamjet konfirmojnë se irritimi i lojtarit në takimin kundër Juventusit ka ardhur si pasojë e një vendimi të gabuar të gjyqtarit Maxoleni.

KTHIM PAS – Në momentin e ndëshkimit, pavarësisht tensionit, Gonzalo u mundua t’i qetësojë edhe lojtarët e Juventusit, përveç shokëve të Milanit. Ronaldo, Kielini e në

fund Matudi, ishin ndër ata që iu afruan argjentinasit në daljen e tij nga fusha. Lojtari nuk i ka ndërprerë ende marrëdhëniet me ish-skuadrën, sepse vlerësohet nga të gjithë që nga trajneri e deri te tifozët, ndërsa vetë Higuain ka thënë që ishin drejtuesit ata që e larguan. Duhet kujtuar se argjentinasi është i huazuar (për 18 milionë euro të paguara) te Milani teksa blerja e tij (edhe 36 milionë euro) mund të

ndodhë në fund të sezonit. Kuqezinjtë kanë të drejtën e blerjes së kartonit, por duke parë koston e lartë (karton, rrogë dhe taksa) mund të stepen, sidomos me bomberin që vazhdon të shfaqë një lloj “alergjie” ndaj ndeshjeve të mëdha. Fundi i sezonit do të hedhë dritë mbi vendimin e Milanit, por nëse Higuain nuk ndryshon, ka mundësi që martesa me “Djallin” të mos përfundojë në “altar”.