Nga ferri në parajsë, Milani mund Dudelanzhin
Dudelanzhi befason “Djallin”, Çalha e dërgon në “parajsë”
Frika, më pas shkund ja e në fund goleada. Milani mund 5- 2 Dudelanzhin në ndeshjen e pesë të Grupit F në Ligën e Europës, por fillimisht gabon duke nënvlerësuar rivalin. Në 30 minutat e fundit, kuqezinjtë zgjohen dhe shënojnë tri herë. Fitorja rezulton e dobishme për “Djallin” që ndaj Olimpiakosit mund t’i lejojë vetes një humbje duke mbrojtur 3- 1 e takimit të parë, sikur ajo e radhës të ishte një sfidë me eliminim direkt.
BARAZIM NË PUSHIM — Milani me sa duket i ka alergji luksemburgasit, sidomos nëse marrim për bazë edhe ndeshjen e parë ku skuadra e Gatuzos mezi fitoi 1-0. Dje u përsërit skenari i 20 shtatorit të kaluar, me miqtë që patën luksin e gjetjes së dy golave. Shtols gjen goditjen e jetës për të barazuar 1-1, teksa fillimisht Milani kishte kaluar në avantazh me Kutronen të shërbyer nga Higuain për golin e katërt sezonal në Ligën e Europës. I diskutueshëm goli mik për shkak se erdhi nga zhvillimet e një goditjeje këndi të dhënë gabimisht nga arbitri. Nën vëzhgim ishin Haliloviç, Bertolaçi dhe Simiç, por vetëm ky i fundit dha disa sinjale inkurajuese, megjithëse kishte një kohë të gjatë pa luajtur.
“PIPITA” — Numrit 9 kuqezi nuk i mjafton asisti, teksa kërkon patjetër golin, duke ditur skualifikimin që e pret
në kampionat. Ashtu si argjentinasi, edhe Çalhanoglu që spikat më shumë për zell sesa kthjelltësi. Kur pritet të shkëlqejnë milanistët, Tyrpel ngrin “San Siro”-n, falë edhe një gabimi të Zapatës. I kapur në befasi nga kolegu Topmëler, Rino Gatuzo hedh në fushë Suson në vend të Haliloviçit. Me spanjollin kuqezinjtë rrisin xhirot, por përsëri Shtolc i afrohet golit të tretë.
REAGIM - Kur duket se sfida do të transformohet në makth për vendësit, Çalhanoglu kroson fort në zonë. Kutrone sulet drejt topit dhe lëvizja e sulmuesit detyron Kruc të devijojë topin në portën e tij. Barazim. Dinamikë thuajse e njëjtë për golin e katërt, kur Shnel çon topin pas shpinës së Bonfua, teksa më parë kishte shënuar dhe Çlahanoglu me një të
djathtë nga 25 metra, gol për të cilin më shumë peshon gabimi i portierit se forca e turkut. Ky i fundit protagonist edhe në golin e pestë. Suso kroson në zonë dhe numri 10 sheh goditjen t’i ndalet nga traversa. I sapofuturi Borini e ka fare të lehtë
të vulosë sfidën me rezultatin përfundimtar, teksa Milani sheh nga Sevija, ku Betisi mund Olimpiakosin. Sfida në Greqi do të vendoset nga rezultatit i takimeve direkte, me kuqezinjtë që duhet të ruajnë fitoren 3-1 në “San Siro”.