Grumbullohet Ngo, gati edhe Blazhevski
Tirana ka zhvilluar stërvitjen e fundit në prag të sfidës me Partizanin dje në mesditë. Menjëherë, grupi ka lënë "Skënder Halilin" dhe është grumbulluar në hotel, ku pasi ka konsumuar drekën, në mbrëmje ka zhvilluar edhe një takim analizë. Stërvitja - Gjatë stërvitjes së djeshme, trajneri Ardian Mema, gjatë gjithë kohës, e ka vënë theksin te rreshtimi i skuadrës në lojë dhe goditjet inaktive. Mema është marrë me rreshtimin e mbrojtjes, i cili është problemi më i madh i ekipit gjatë javëve të fundit. Mema disa herë ka ndalur lojën dhe ka kërkuar perfeksion nga lojtarët e tij në fushë. Formacioni - Edhe pse është munduar që ta fshehë formacionin për të dytën ditë radhazi, Mema duket se e ka marrë vendimin. Nga minuta e parë do të luajë Grent Halili. Sulmuesi do të zëvendësojë Grecën e skualifikuar. Për sa i përket formacionit, Abibi do të jetë në portë, më pas Doka, Atinga, Hoxhallari e Imami që përbëjnë prapavijën. Në mesfushë pritet të luajnë Maveje, Daja e Karabeci. Nga krahët Sentamu djathtas dhe majtas Halili, ndërkohë që në sulm pritet të luajë nga minuta e parë, siç ndodhi kundër Flamurtarit dhe Skënderbeut, Edon Hasani. Në fakt, tre gjysmësulmuesit do të luajnë në vijë të drejtë për të hapur frontin e mbrojtjes së Partizanit. Ajo që ishte e veçantë dje mbante emrin Majkëll Ngo. Anglezi së bashku me dyshen Blazhevski e Kobina ishin rreshtuar tek ekipi i dytë, por një lëvizje ekstreme nuk është çudi t'i kalojë titullarë.
Grumbullimi - E reja e grumbullimit të Tiranës është që për herë të parë pas takimit me Flamurtarin, është grumbulluar Majkëll Ngo. Anglezi ka kaluar ditët e errëta dhe tani do të jetë me Partizanin. Një ndryshim rrënjësor i Memës, i cili duhet të pranojë sulmuesin, edhe pse përplasja me anglezin ka qenë e fortë.
Fiton Ze Maria - Krahasimet dhe statistikat janë për të treguar forcën! Edhe pse duhen edhe dy javë që të bëhet një krahasim i plotë Ze Maria-Mema, duket se për gjashtë javët e para ai që është përpara quhet Hoze Marselo Ferreira. Në takimet e para me bardheblutë, Memës i mungon fitorja, pasi ka barazuar dhe humbur në tri takime, duke marrë 3 pikë, ndryshe nga braziliani që ka 5 pikë. Skuadra e Ze Marias ka shënuar 5 gola, ajo e Memës 4, ndërsa golat e pësuar i kanë të barabartë, nga shtatë.