Idrizaj: Barazimi mjafton në Laç, të mos justifikohemi me gjyqtarët
Kamza/ Kthehet Avdyli, gati edhe Malaj me Orelesin
Kamza po kalon moment mjaft të vështirë. Skuadra ndodhet e parafundit dhe ka një ngërç rezultatesh. Edhe ardhmja e trajnerit Ernest Gjoka nuk ka sjellë ndryshimin e madh. Sfida e ardhshme, ndaj Laçit pritet që të jetë një tjetër takim i vështirë. Për mbrojtësin e majtë, Hektor Idrizaj, kjo ndeshje është mjaft delikate dhe kërkon impenjimin e të gjithë titullarëve. “Transferta me Laçin është mjaft e vështirë. Nga ana jonë kërkohet që të kemi impenjim maksimal për të dalë nga kjo krizë rezultatesh”, thotë fillimisht ai për “Panorama Sport”. Duke vijuar më tej lidhur me ngërçin e krijuar në këtë skuadër, vlonjati e ka një argument edhe mbi gjyqtarët, të cilët po bëhen “kundërshtarë” të ekipit. “Në të gjithë botën arbitrat janë kundërshtarë dhe kudo ka kontestime. Nuk mendoj se varet gjithçka nga ata. Në fund të fundit nuk është arbitri ai që e ka topin në dorë, kështu që nuk duhet krijuar alibi lidhur me shkaqet e rezultateve tona. Është e natyrshme që ndikon, por jo vendimtar për rezultatin. Ne në Laç shkojmë edhe për barazim! Të marrësh një pikë, në këtë moment të Laçit, jo vetëm për skuadrën tonë, por edhe për skuadrat pretendente, është një rezultat pozitiv. Pastaj na bën punë ose jo, kjo është diçka tjetër. Edhe vetëm të humbasësh nuk është gjë e mirë”, përfundon Idrizaj. Sakaq, ekipi do të jetë më shumë se i plotë këtë javë. Si kurrë më parë nuk ka të pezulluar dhe as të dëmtuar. Argjend Malaj ka ezauruar skualifkimin e kartonëve, ndërsa Ilir Avdyli dje është kthyer nga Kosova pas dramës familjare. Po ashtu, edhe Nuredin Orelesi është rikuperuar pas dëmtimit. Abdulla Dushku