Golat për një skuadër, Mesi parakalon Ronaldon

106 gola në Champions, portugezi ka 105

Vazhdon dueli në distancë mes Kristiano Ronaldos dhe Lionel Mesit edhe tani që ata nuk luajnë më në të njëjtin kampionat. Nëse të martën portugezi i Juventusit festoi 100 fitoret në Champions, një ditë më vonë kundër PSV- së, i takoi argjentinasit për t’u ngjitur në katedër e për të vendosur një tjetër nga shumë rekordet e tij personale: atë të 106 golave në Ligën e Kampioneve, gjithnjë me të njëjtën skuadër. Askush nuk ka shënuar kaq shumë sa “pleshti” në kompeticion me një skuadër të vetme. Ai la pas portugezin, i cili ka shënuar 105 gola në Champions me fanellën e Realit. Një rekord që Barcelona e festoi në mënyrë speciale, duke postuar tingujt e Fred Mërkurit me “Leo”. Tani kapiteni ka barazuar rekordin e Gerd Mylerit, 565 gola të shënuar për një skuadër (me fanellën e Bajernit)

dhe përpara ka vetëm Pelenë me 643 gola për Santosin. I duhen 78 gola që të barazojë rekordin e legjendës braziliane, një arritje e mundshme duke parë formën dhe moshën e tij. REKORDMENËT E GRUPEVE – Çfarëdo që të ndodhë në ndeshjen e fundit në Grupin B, Barcelona e ka siguruar vendin e parë me fitoren ndaj PSV-së 2-1 të mërkurën, duke u bërë edhe ekipi që e ka fituar më shumë grupin në historinë e Championsit, plot 20 raste dhe 12 radhazi që prej sezonit 2007-‘08. Për herë

të parë, dominimi nisi me skuadrën e ëndrrave të Krojfit në sezonin 1991-‘92 dhe prej atëherë katalanasit e kanë ngritur trofeun europian 4 herë, 2006, 2009, 2011, 2015. Që prej sezonit 2004-‘05, ata kanë shkuar gjithnjë në 1/8-at, 15 sezone radhazi. Katalanasit lënë pas Mançester Junajtid dhe rivalët e Realit të Madridit, me 16 fitore të grupit. Tani sfida e radhës do jetë kualifikimi në çerekfinale, e cila ka qenë finishi i tyre i fundit gjatë tri sezoneve të shkuara. Shorti i 1/8ave do të hidhet më 17 dhjetor, në Nion të Zvicrës.