Mema: Fitore për tifozët, listën e merkatos e kam dorëzuar

Trajneri, i bindur se skuadra do të nisë marshimin në kampionat

Ardian Mema më në fund mund të marrë frymë i qetë. Në javën e nëntë si trajner merr fitoren e parë. Meritë kjo edhe e Kastriotit që nuk goditi një herë portën. "Në Gol pas Goli", trajneri i bardhebluve rrëfeu gjithë takimin me krutanët. Dy fjalë për zëvendësimet. Nuk munguan as komentet për sa i përket merkatos së janarit. Në fund tekniku Mema ka zbuluar se kjo fitore u dedikohej tifozëve të Tiranës. Ja intervista e plotë me Ardian Memën. Kjo fitore vlen më shumë se 3 pikë?

Do të thosha që po. E kam pritur këtë fitore disa ndeshje më parë. Fitorja nuk vjen rastësisht. Edhe pse fituam 4-0 sot( dje), kemi pasur momente kur kemi qenë nervozë. Mendoj se rezultati thotë gjithçka.

Sa e ndihmon Tiranën goli i shpejtë?

I kemi pasur mundësitë edhe në ndeshjet e tjera që të shënonim më shpejt. Ekipi tregoi një forcë karakteri. Ka qenë gjatë gjithë kohës në ekuilibër. Ana psikologjike ka qenë më ndryshe gjatë shënimit të golit. Ndeshjet me Partizanin lënë shenja në ekip. Kam qenë nën tension. Ndërrimi i Grecës me Mavejenë

E përforcova mesin e fushës, kundërshtari po na sulmonte dhe po krijonte raste. Mendova të fus 2 lojtarë në linjën e sulmit dhe mesfushorë. Këtë skemë e kemi aplikuar dhe më parë, ndaj mendova që ta aplikoja dhe sot(dje).

A ndikon fitorja në objektivat e merkatos. A tërhiqeni nga dëshira për të pasur një sulmues të mirë. A i keni dhënë mundësinë Xhafës që të thotë "jo" kur ju nuk jeni i qetë?

Kemi pasur momente gjaknxehtësie, por gjëja e parë që trajneri duhet të mësojë është të jetë më i qeti në stadium. Kjo ndeshje nuk ndikon fare në merkato. Realisht po kërkojmë futbollistë. Nuk mund t'ua them pozicionet.

Sa për qind e kësaj skuadre vlen për atë skuadër që keni në kokë?

Unë nuk jap informacione të kësaj natyre. Janë informacione "top-secret". Unë kam biseduar me presidentin dhe përgjegjësit e klubit që duhet të marrim lojtarë të tjerë. Kjo i bën mirë grupit, rrit konkurrencën. Ka hapësira për çdo njeri. Futbollistët kanë mundësitë e tyre për t'u shprehur. Nëse në një ekip vendosen 10-12 veta që luajnë dhe pjesa tjetër duket sikur kanë lenë sportin, kjo nuk është pozitive.

A jeni më të qetë pas kësaj fitoreje?

Unë shoh që ju të "SuperSportit" jeni më të gëzuar për mua. (Ishte thjeshtë batutë.) Çdo fitore të gëzon. Shpresoj që të ketë kthyer disi kjo anë psikologjike. Ishte thjesht vetëm një ndeshje. Nëse nuk përqendrohemi, do na rikthen gjërat mbrapsht. Duhet të jemi të kujdesshëm, ndeshjen tjetër e kemi në Laç. Nesër fillon puna kundër Laçit.

A keni dedikim për këtë fitore?

Të them të drejtën, nuk e kam menduar. E mendoja këtë fitore në një ndeshje tjetër. Gjithsesi, ua dedikoj tifozëve të Tiranës. Presin shumë nga ne. Nuk mund të themi dot më tepër. Është thjesht një ndeshje radhe e fituar. Nëse nuk u kthehemi gjërave siç duhet, ky ekip do ketë probleme, nuk diskutohet.