Lojtarët në vëzhgim, provë karakteri për Luftëtarin
Lojtarë që kanë kërkuar largimin prej rrogave të pa marra, të tjerë që janë "mbytur" prej premtimeve të menaxherëve apo avokatëve të ndryshëm se mund të zgjidhin kontratën me Luftëtarin. Situata kritike te bluzinjtë vazhdon dhe në këtë moment janë skuadrat e tjera që kontaktojnë futbollistët për t'i joshur, paçka se të ardhmen e tyre e ka në dorë vetë klubi gjirokastrit. Kjo javë ka qenë ndoshta më e vështira për trajnerin vlonjat, Gentjan Mezani, që kur mori drejtimin e Luftëtarit. Drejtuesit duket sikur e kanë braktisur skuadrën, ndërsa futbollistët mezi presin të mbyllet faza e dytë dhe t'i japin drejtim situatës. Mirëpo, për të zgjidhur kontratat e tyre nuk është aspak e lehtë, edhe pse ndonjë prej lojtarëve vijon të "kërcënojë" klubin. Në këto kushte, ku për anën teknike është e vështirë të flasësh, Mezani është munduar të punojë me tepër me anën psikologjike me secilin futbollist. Sot ndaj Kamzës ata kanë një provë karakteri, sepse së pari duhet të luajnë për veten e tyre, pasi janë nën vëzhgim nga të gjithë për faktin se si do të reagojnë pas ditëve të trazuara. Është në nderin e tyre që të qenë dinjitozë, pasi janë profesionistë. HESHTJA - "Çfarë të themi, pyesni presidentin?". Këto janë fjalët që dëgjon nga lojtarët kur i pyet për situatën në skuadër në prag të ndeshjes së sotme me Kamzën. As trajneri Gentjan Mezani nuk ka preferuar të flasë, ndërsa dje skuadra u grumbullua në Durrës. Duket se përplasja e aksionerëve të klubit ose ndoshta kapriçot e momentit mes tyre po e çojnë Luftëtarin në një prej momenteve më delikate. Sa i përket ndeshjes së sotme, përveç Behar Ramadanit të pezulluar, do të mungojë edhe Lejdi Liçaj, i cili ka dalë jashtë planeve të stafit teknik dhe gjithashtu klubit, teksa pritet vetëm prishja e kontratës. Ndërkohë në seancën e djeshme ka munguar zv. trajneri Pakualeti, i cili ka marrë leje në klub për probleme personale.