Burreli ndal Erzenin, Plori “asist” Vllaznisë
Erzeni bie pas 5 javësh. Edhe pse nuk e njihnin humbjen që prej 20 tetorit, shijakasit humbën në “Liri Ballabani”. Skuadra e Elvis Plorit merr një trepikësh shprese për mbijetesën dhe në të njëjtën kohë i jep një “asist” Vllaznisë (që me ndalesën e rivalit ka shansin që të shkojë +7, gjithnjë nëse fitojnë sot përballë Dinamos). Një gol i Mateo Levendit në të 50-ën ka “vulosur” këtë duel dhe i ka dhënë një fitore të çmuar Burrelit, që shkon në kuotën e 12 pikëve, pas 12 javësh të zhvilluara. NDESHJA – Loja ka nisur me vendësit shumë të kujdesshëm që të mbanin larg zonës së tyre kundërshtarin. Madje, ia dolën më së miri, pasi gjatë gjithë kësaj pjese, Erzeni nuk mundi që ta vinte në asnjë moment në rrezik portën e mbrojtur nga Selaci. Matjanët, edhe pse ishin me forca të shumta në prapavijë, nuk lanë pas dore presingun dhe hera-herës u munduan që të zinin në befasi kundërshtarin me atë të kundërsulmeve. Por rastet e Ajazit, Farrukut dhe Levendit nuk u finalizuan siç duhet dhe për pasojë skuadrat iu drejtuan dhomave të zhveshjes me rezultatin 0- 0. E dyta rinisi me Burrelin në sulm, madje për minuta me radhë portieri Vata u vendos në provë. Edhe pse bëri mirë në disa momente, në të 50- ën nuk ia doli dot. Met’hasani ekzekutoi një goditje dënimi drejt zonës mike dhe gjeti Ujkajn, ky i fundit uli topin me kokë në të djathtë ku ishte i pozicionuar Levendi, i cili gjuan fort drejt portës dhe zhbllokon shifrat në 1-0. Entuziazmi në shkallët e stadiumit ishte i madh, por goli nuk e ndali hapin e vendësve, të cilët kërkuan me ngulm dyfishimin e rezultatit.
Rasti më i pastër i humbur ishte ai i minutës së 68-të, kur Levendi edhe pse ndodhej pak metra larg portës mike, nuk shënjestroi siç duhet dhe topi përfundoi vetëm jashtë. Rasti i vetëm i miqve me anë të Gjokës në minutën e 79të, kur lëshoi një predhë në distancë. Por mendoi Selaci që t’i thotë “jo” golit të barazimit. As katër minutat shtesë të dhëna nga gjyqtari i katërt nuk i dhanë shpresë Erzenit dhe për rrjedhojë gjithçka mbyllet 1- 0 në favor të Burrelit, të cilit edhe pse mbetet në vend të parafundit, i shtohen shpresat për të shpëtuar.