Besa përmbys Tomorin, Devolli: Ishte si në 97-ën
Trajneri akuzon gjyqtarin: U dha fitoren vendësve
esa është rikthyer te fitorja nën praninë e tifozëve që u kishte mbaruar dënimi. Pas dy rezultateve zhgënjyese me Pogradecin në shtëpi dhe humbjes në Fier, duket se tifozët verdhezi i sollën fat skuadrës. Pasi janë surprizuar në 45 minutat e para 0- 1 për Tomorin, verdhezinjtë kanë shpërthyer ku fillimisht ka qenë një perlë e Alket Çelhakës nga 20 metra që ekzekuton një goditje dënimi “alla Mesi”, duke e çuar topin në trekëndësh dhe më pas Onuh i ardhur nga stoli shënon golin e fitores. Një 3pikësh i merituar, ndërsa trajneri mik, Devolli, fajësoi gjyqtarin në fund të takimit. “U zhvillua një ndeshje si në 97ën. Këtu nuk e kam fjalën për atë çfarë prodhoi fusha, pasi dy ekipet ishin shumë ‘Fair Play’ dhe luftuan fort. Shënuam të parët dhe humbëm raste të tjera. E kam me gjyqtarin që sipas meje i dha fitoren Besës”, tha Devolli pas ndeshjes. Me këtë fitore, Besa ruan hapin e Bylisit. NDESHJA
Besa futet në fushë me besim dhe vetëm për fitore pas dy ndeshjeve zhgënjyese ku la katër pikë. Pa kapitenin Mihani vendësit që në minutat e para hidhen në sulm. E ndërsa pritej gol nga Besa, janë miqtë që befasojnë me Sharavollin që përfiton nga një gabim i prapavijës vendëse, godet dhe shënon kur kishin kaluar vetëm 12 minuta lojë. Në minutën e 22të, Besa “tërbon” gjithë stadiumin kur 3 futbollistë të saj thuajse mbi vijën fatale ngatërrohen me mbrojtësit miq dhe nuk shtyjnë dot topin në rrjetë. Ndërsa kavajasit mundohen të shënojnë,
miqtë jo vetëm mbrohen mirë, por befasojnë jo pak herë në kundërsulmet e tyre ku bie në sy autori i golit Sharavolli. Minutat kalojnë dhe portieri mik, Kaloshi, bën heroin kur ndal një kthesë të Thaçit, duke evituar gol të sigurt. Pjesa e dytë nis me një Besë shumë më kërkuese dhe më të qartë. Tashmë shihen të dalin në manovrën sulmuese edhe mbrojtësit Biba e Krasniqi në ndihmë të sulmit. Kjo lojë sjell raste të pastra për vendësit, por që nuk dinë t’i shfrytëzojnë. Çekiçi në një ditë jo të mirë nuk merr dot përsipër të rrezikojë portën mike. Megjithatë, ky presion jep rezultat krejt ndryshe nga çfarë pritej. Në minutën e 51- të akordohet goditje dënimi në të djathtë të zonës mike në distancë mbi 20 metra. Mesfushori Alket Çelhaka ekzalton gjithë stadiumin kur realizon një eurogol, duke e dërguar topin në trekëndësh dhe 1-1. Me kalimin e minutave, Begeja bën lëvizjen që rezultoi fituese, duke larguar Çekiçin dhe futur në lojë sulmuesin tjetër, Onuh. Në të 85-ën është sulmuesi i sapofutur që realizon brenda zonës, duke i dhuruar Besës tri pikë të rëndësishme.