Nga Torino jo vetëm hidhërim, Spaleti me "leksione" për PSV-në
Interi ka dalë nga transferta në "Allianz Stadium" jo pa asnjë "fitore". Paraqitja pozitive lë vend për të shpresuar në optikën e ndërtimit të një projekti anti-Juventus, por humbja sjell me vete aspekte të ndryshme negative: rezervat e Spaletit, Naingolani ende jo i rikuperuar, paaftësia për t'i shënuar një mbrojtjeje "të vërtetë". Mendime që duhen harruar sa më shpejt: të martën (ora 21:00) në "San Siro" zbarkon PSV Eindhoveni dhe nevojitet një fitore për të shpresuar në 1/8-at e Champions-it. Me sytë, gjithmonë, nga Barça-Totenhem.
BORHA-POLITANO - "Këtë vit po ndodh kështu, zëvendësimet po i gaboj të gjitha. Sot nuk fle…", tha Spaleti me një buzëqeshje pas sfidës. Një thumbim drejtuar kritikëve (e njëkohësisht një "mesazh" për Piero Auzilion në prag të merkatos), por me tonin e dikujt të vetëdijshëm që, nëse do mund të kthehej pas, nuk do e ribënte: jo shumë për sa i përket lëvizjes taktike, pra aktivizimi i Borha Valeros për të rritur zotërimin e topit, por zgjedhja e zëvendësuesit, pasi deri në atë moment Politano ishte më i rrezikshmi nga zikaltrit. ALTERNATIVA SHËNIMI - Një ndërrim që rrëzoi një pjesë madhore të planit taktik. Pa harruar dy shanset e mira të krijuara përpara avantazhit të bardhezinjve: shtylla e Galjardinit dhe rasti në fillim të pjesës së dytë me Politanon, i bllokuar nga Bonuçi. Është e nevojshme të kërkohen zgjedhje alternativa shënimi, edhe sepse Naingolan nuk do jetë në gatishmëri për Ligën e Kampioneve: të premten Ikardi nuk e goditi asnjëherë portën (nuk ndodhte nga marsi) dhe skuadra nuk shënoi për herë të parë pas 10 ndeshjesh radhazi.
GRUPI B - PSV-ja, rivali europian, në krahun tjetër, fitoi 6-0 ndeshjen përkatëse në kampionat (kundër Ekscelsiorit). Totenhemi ka avantazhin në grup për shkak të golit në fushë kundërshtare, ndaj për 1/ 8-at zikaltrit duhet të bëjnë së paku një pikë më shumë se londinezët. Një sukses në Champions do i jepte një shtysë të madhe edhe moralit interist për të mbyllur 2018-ën: përpara është sfida me Napolin, ku do nevojitet qetësi. Sepse një humbje e ngushtë në shtëpinë e kryesueses nuk mund të hedhë poshtë siguritë e Interit: duhet të shërbejë si "leksion" për t'u përmirësuar akoma më shumë.