Magjia e Torreiras, vulos tri pikë të arta për Arsenalin
Arsenali po shijon formën e jashtëzakonshme të "xhuxhit" Lukas Torreira, i cili përveçse rikuperon topa dhe regjistron km pafund, merr edhe karakteristikat e bomberit. Goli me roveshatë i mesfushorit uruguaian në minutën e 83-të ndaj Hadërsfilldit e dërgoi në 21 numrin e ndeshjeve radhazi pa humbje të "topçinjve" këtë sezon. Java e 16-të dhe pas barazimit 2-2 në "Old Trafford" me Mancester Junajtid, në "Emirates" Unai Emeri kërkonte me çdo kusht fitoren. Por ndeshja nuk po zhbllokohej. Fluturojnë kartonët (shtatë të verdhë vetëm në pjesën e parë). Luftë deri në minutën e 82-të, kur tabela lexon 0-0. Por pasi kalojnë 30 sekonda nga kjo minutë, Guenduzi peshkon Obamejangun në zonë, i cili kontrollon me koordinim perfekt, shkon në fundore dhe kroson drejt zonës së vogël: ftesës i përgjigjet mesfushori shtatshkurtër, i cili shpërthen në festë "Emirates". Goli vendimtar vjen në 10 minutat e fundit. Në klasifikimin e golave të vonë, Arsenali ka grumbulluar 8 pikë, më shumë se çdo skuadër tjetër. Pas tyre renditet Junajtid (4), ndërsa Çelsi, Liverpuli dhe Siti kanë fituar vetëm 3 pikë në 10 minutat e fundit këtë sezon në kampionat. Emeri - "Ishte një ndeshje e fortë. Jam shumë i lumtur me rezultatin. E patëm të vështirë ta kontrollonim ndeshjen. Durimi është fjala kyçe. Doja të fitonim më shpejt, por duhet të tregoheshim të duruar. Duhet të përmirësohemi dhe t'i fitojmë ndeshjet me më shumë kontroll, por jemi konkurrues dhe treguam karakter", u shpreh trajneri i Arsenalit.