Liçaj sërish jashtë, Kamza gjymtohet
"Panorama Sport" ju sjell momentet pikante të ndeshjes, me situata para dhe pas fillimit të saj, që nuk janë transmetuar në televizion.
* Para fillimit të ndeshjes tifozët thumbojnë delegatin Besnik Çela: "Po ty, të ka bërë Xhelali pasaportizimin në Kamzë që e ke marrë në patronazh çdo ndeshje këtu?"
* Nga drejtuesit e Luftëtarit në tribunën qendrore ishte i pranishëm vetëm zv.presidenti Harrallamb Tavo, i biri i presidentit Grigor Tavo. Në krah të tij qëndronte edhe ish-aksioneri i klubit, Artur Dadaj.
* Mbrojtësi vlonjat, Lejdi Liçaj, për të tretën ndeshje radhazi nuk u grumbullua nga trajneri Gentjan Mezani. Ashtu siç ka paralajmëruar "Panorama Sport", Liçaj ka dalë jashtë planeve të stafit që pas ndeshjes FlamurtariLuftëtari 0-0 dhe tashmë mbetet në dorë të drejtuesve prishja e kontratës me lojtarin.
* Fukui, pasi shënoi golin tregoi një fanellë me mbishkrimin "Brother of Ilir Avdyli", duke ia kushtuar atë gol vëllait të portierit të Kamzës që u nda nga jeta. Arbitri fillimisht donte t'i nxirrte karton, por kur pa mbishkrimin, nuk e ndëshkoi. * Dëmtohet rëndë Orjad Beqiri, i cili transportohet me barelë deri në qendrën shëndetësore, e cila ndodhet ngjitur me stadiumin dhe më pas është dërguar në Spitalin Ushtarak me shërbimin e ambulancës.
* Në minutën e 50-të ka një moment pasigurie të kryesori Bajramaj, që duke ecur mbrapsht, rrëzohet, ilaritet dhe të qeshura nga tifozët.
* Fati i keq ndjek Kamzën, teksa në të 59-tën dëmtohet edhe qendërmbrojtësi Olsi Teqja, edhe ky detyrohet të lërë fushën. * Aleksi ishte një nga lojtarët më të mirë të Luftëtarit, por njëkohësisht ishte dhe më i kontestuari nga ana e tifozërisë vendëse.