Besa ngec mes tensionit, Tomori pa trajner
Trajneri gjirokastrit largohet pas humbjes me Egnatian
Besimi për të marrë një rezultat pozitiv në ndeshjen e fundit të këtij viti, nuk ka rezultuar i saktë. Tomori ka zhgënjyer ndaj Egnatias, duke humbur me rezultatin 1-3. Ky rezultat i rëndon edhe më shumë pozitat e beratasve, që e mbyllin vitin 2018 në vendin e 8të të renditjes. Lojtarët nuk bindin në asnjë drejtim dhe kjo është një fatkeqësi, që duhet ta përjetojnë tifozët. Madje, ka pasur edhe nga ata tifozë, të cilët janë konfliktuar fizikisht me disa prej lojtarëve, duke iu drejtuar atyre që të heqin fanellat. Një mbyllje e shëmtuar e Tomorit për këtë vit, në një kohë që e nisi sezonin si pretendent për ngjitjen në Superiore. Pas ndeshjes së djeshme, trajneri i beratasve, Bledar Devolli është takuar me drejtuesit e klubit ku u ka paraqitur dorëheqjen që është pranuar nga ata. Në një prononcim për gazetën “Panorama Sport” pas vendimit, Devolli tha: “Erdha me synimin për të bërë një gjë të mirë dhe të bukur te Tomori me objektivin për të luftuar për elitën. Por, gjërat nuk shkuan si duhet. I marr të gjitha përgjegjësitë për rezultatet negative në ndeshjet e fundit. Që nga ky moment nuk jam më në krye të Tomorit, duke dhënë dorëheqjen. I uroj suksese skuadrës në pjesën e mbetur të kampionatit”, tha Devolli në prononcimin e tij për gazetën. Dy trajnerë janë larguar nga Tomori deri tani, Gersi Arbri pas javës së parë dhe tashmë tekniku gjirokastrit.
NDESHJA
Loja ka nisur në superioritet për miqtë nga Rrogozhina, të cilët me anë të Branicës godasin shtyllën, pas një topi të dhënë nga Ruço. Tomori do të reagonte më vonë me anë të mesfushorit Drabo, i cili nuk shënjestron siç duhet portën e Haremit, pas një asisti të dhënë nga Shaqe. Beratasit thyejnë “akullin” në minutën e 10-të, teksa Sharavolli kroson në rrëmujë dhe topi i përplasur në këmbët e Bakiasit përfundon në rrjetë dhe 10. Më vonë, Friday do të provonte nga trajektorja me një goditje të fortë në trekëndësh, por Haremi largon rrezikun. Në minutën e 28-të, Bakiasi kroson në zonë, ku Canka godet fort me topin që përplaset në traversë. Këtu përfiton Branica, i cili barazon rezultatin në 1-1. Në të 35-ën, Branica godet me anë të një “perle” nga faulli dhe topi përfundon në krahun e djathtë të rrjetës, 1-2. Në të 46ën, Egnatia tregohet e rrezikshme me Cankën që “peshkon” shtyllën, por kundërpërgjigjja e beratasve do të ishte e menjëhershme, ku Sharavolli shënon. Festa e tij prishet nga vendimi i anësorit. Bakiasi në minutën e 63-të dërgon një top pa pretendime në zonën e Kaloshit, teksa ky i fundit gabon rëndë dhe Branica, i gjendur fare pranë, shënon golin e 3-të personal dhe 1-3. Sakaq, beratasit do të reagonin në minutën e 80-të, teksa Dyca kroson për Dervishin, që shkon shumë pranë golit. Minutat e mbetura nuk sollën asnjë rast dhe kjo humbje i ndërlikon jashtë mase objektivat e beratasve.