Luftëtari, 15 mijë euro për të thyer Partizanin
Nuk janë dhënë rrogat e plota, por s'mungojnë shpërblimet
Luftëtari ka disa arsye pse duhet të mposhtë Partizanin kryesues në Gjirokastër. Shpesh, ky duel ka prodhuar ndeshje spektakolare dhe rezultate të çmendura, por në sfidën e sotme në orën 13:30, që do të mbyllë edhe fazën e dytë të kampionatit, në kampin bluzi kanë gjetur një motiv ekstra për futbollistët. Edhe pse këta të fundit kanë qenë jo pak të mërzitur për shkak se klubi nuk iu ndau rrogën e plotë para ndeshjes me Partizanin, dje kanë marrë një premtim bindës për të ndryshuar atmosferën. "Fitoni dhe keni 15 mijë euro premio në dispozicion", kanë thënë drejtuesit para skuadrës. Natyrisht, stafi teknik dhe lojtarët e kanë mirëpritur, për më tepër që skuadra vjen pas një fitoreje të bujshme në Korçë. Një tjetër sforco ndaj kryesuesve në Gjirokastër do të shpërblehej në mënyrën më të mirë, edhe pse shkalla e vështirësisë mbetet e lartë. "Panorama Sport" zbulon se premio është zyrtarizuar vetëm dje, pasi më parë ka pasur zëra se në dispozicion të ekipit do të jenë 10 mijë euro. Por, kësaj shume i janë shtuar edhe pesë mijë të tjera. Nuk është çudi që shpërblimi të jetë vendosur nga ndonjë skuadër rivale për titull e Partizanit, por në klubin bluzi e përgënjeshtrojnë këtë mundësi, që gjithsesi nuk është e paligjshme. Në fakt, që përpara ndeshjes Skënderbeu-Luftëtari, vetë presidenti i klubit gjirokastrit, Grigor Tavo, bëri një mbledhje me skuadrën dhe vendosi si ultimatum katër pikë. Tri pikë u morën në Korçë dhe tashmë mjafton vetëm një ndaj Partizanit që skuadra të arrijë synimin. Vetë Tavo është shprehur se skuadra do të ketë premio në rast se fitojnë me të kuqtë, por pa përmendur shifra. Në të njëjtën kohë mësohet se lojtarëve u është premtuar se rrogat do t'u shpërndahen në fillim të javës së ardhshme, në mënyrë që të largohen drejt shtëpive të kënaqur dhe jo të dëshpëruar për vonesat e shumta që kanë krijuar kaos në skuadër.