Barcelona s’fal para syve të Iniestës, mbyll vitin në krye
Mesi-Dembele thyejnë Seltën, Valverde i pakënaqur
Përpara syve të Andres Iniestës, i cili është me pushime në Barcelonë, katalanasit nuk zhgënjejnë. Fitojnë 2-0 kundër Selta Vigos dhe e mbyllin vitin 2018 në krye të tabelës së klasifikimit me 3 pikë avantazh me Atletikon dhe 6 me Sevijën që luan sot kundër Leganesit. Golat u shënuan nga Dembele dhe Mesi, me këtë të fundit që vazhdon të blindojë vendin si golashënues i kampionatit.
ZGJOHET DEMBELE- Valverde kishte rikuperuar Semedon, por nuk mund të bënte llogari me Murijon, të sapohuazuar nga Valencia. Konfirmohet Vidal në mesfushë, ndërsa brazilianët Artur dhe Kutinjo qëndrojnë në pankinë. Rakitiç nuk pushon kurrë, ashtu si Mesi. “Pleshti” krijoi golin e parë dhe shënoi të dytin. Në minutën e 10-të merret vesh mirë Albën dhe lëshon një predhë në drejtim të portierit Ruben Blanko. Ai e ndal dhe pastaj Dembele mbërrin i pari për ta dërguar në rrjetë. Goli i shtatë për të në kampionat, i dhjeti në sezon. Duket se “alarmi” i orës i ka bërë mirë dhe është zgjuar.
MESI NUK NDALET- Barcelona kishte raste të njëpasnjëshme me Albën, i cili u ndal nga portieri. Por, edhe Ter Shtegen bën një ndërhyrje të bukur ndaj Maksi Gomezit. Në një ndeshje jo shumë të bukur është sërish dyshja Alba-Mesi që shkëlqen. Buskets jep një top të gjatë për mbrojtësin dhe ky i fundit gjen një hapësirë në mes të mbrojtjes. I vetëm përballë portierit Mesi nuk mund të gabojë dhe shënon golin e dytë të ndeshjes dhe të 15-in personal në këtë kampionat. Pjesa e parë përfundoi 20, po aq sa e gjithë ndeshja. Në të dytën, Selta Vigo humbi Aspasin për një dëmtim dhe nuk kishte histori. Ndeshja u mbyll me raste sporadike dhe administrim të Barcelonës.
VALVERDE- Pavarësisht fitores, trajneri Valverde nuk ishte shumë i kënaqur. “Më vjen mirë për fitoren dhe për rezultatin, por ka pasur shumë ndeshje të tjera ku kam qenë më i lumtur dhe më i kënaqur për perfomancën. Duhet të përmirësohemi akoma më shumë në të ardhmen”, ka thënë trajneri i katalanasve.