Ulërin Manxukiç, Juvja pa mëshirë edhe ndaj Romës
Sulmuesi kroat konfirmohet "vrasësi" i të mëdhave, firmos golin e tetë në kampionat
Krishtlindja bard hezi festohet në ngrohtësinë e atij që ka bërë të tijin gjysmëtitullin: 1-0 ndaj Romës, ndeshje që nuk vendoset në asnjë moment në diskutim, e dominuar me muskuj dhe ritëm, duke e vulosur titullin e kampiones së dimrit dy javë përpara fundit të fazës së parë. 25 pikë më pas renditet Roma, që feston një nga Krishtlindjet më të ftohta të këtyre viteve të fundit.
DYNGJYRËSHI - Kristiano nuk pushon, jo tani që Juve do të vendosë nën pemë vendin e parë në gjysmën e kampionatit. Bashkë me të Manxukiç dhe Dibala, që furnizohen nga benzina e Matuidit dhe Bentakurit. Juventusi dominon që nga fillimi miqtë e dorëzuar. Plani i Di Françeskos funksionon pak dhe në pjesën e parë nuk duket asgjë veç ngjyrës së bardhë dhe të zezë. Është krahu i majtë, andej nga kampionët sulmojnë më shpesh, ku Sandro, Matuidi dhe Kristiano diktojnë me dinamizmin e tyre. Pikërisht braziliani i shkon pranë golit tri herë në 20 minuta. Nëse nga njëra anë Juventusi koleksionon goditje këndi pafund, në krahun tjetër Roma vuan të dalë nga guaska. Portieri suedez, në një mbrëmje magjike u reziston tentativave portugeze, por kapitullon ndaj asaj kroate. Nga një krosim i ëmbël i De Shiljos, i pazakontë sepse është mëngjarash, Manxukiç bën specialitetin e vitit: pasi kërceu mbi Mario Ruin, Rodrigezin dhe Azamoahan, e përsërit edhe mbi Santon dhe 1-0.
SFIDA E CR7 - Klaivert është për Juventusin ai sulmuesi i rafinuar i Ajaksit, i mposhtur në finalen e Champions-it. Djali i tij Xhastin, dje u përplas me një rivale të vjetër të babait Patrik: i futur në fushë në vend të Florencit për të spostuar skuadrën, ai nuk ia doli dot. Përkundrazi, Kristiano nga ana tjetër vazhdon duelin e tij bajonetë me bajonetë me Olsenin: suedezi i pret gjithçka, me kokë dhe me këmbë, nga larg dhe nga pranë. Dhe portugezit nuk i mbetet gjë tjetër veçse të shqelmojë shtyllën dhe përplasur me fatin dhe lodhjen. Alegri ka premtuar se në një nga dy ndeshjet e ardhshme, kundër Atalantës dhe Sampit, do t'i japë pak pushim, ndoshta e nevojshme. Edhe pse shkëputja e tij në shtesë me krosimin që solli golin e Duglas Kostës, anuluar më pas nga VAR-i, certifikoi se sa i nevojshëm është në fushë deri në sekondën e fundit. Ndërsa shoqëruesi i tij Manxukiç tregon deri në fund se ka një tjetër cilindratë nga pjesa tjetër e skuadrës: ai është i pari mes mbrojtësve kur Roma provon të bëjë diçka të mirë. Ka të njëjtën uri të kapiten Kielinit, i cili vazhdon të jetë në formë të shkëlqyer: mund të kishte shënuar edhe golin e 2-0 me kokë, por arbitri e anuloi. Në 10 minutat e fundit i ndodh që të markojë të rrezikshmin Xheko, por nuk duket se ka ndonjë gjë që mund ta prishë Krishtlindjen bardhezi.