Trashi: Dal kampion këtu dhe më pas pres ofertat

"Afrime në dimër? Edhe Reali ka nevojë për blerje"

Përkrah Skënder Gega, në konferencën për shtyp ishte mbrojtësi i majtë, Lorenc Trashi, i cili është përzgjedhur nga Federata Shqiptare e Futbollit edhe si "Lojtari i Vitit 2018". Ashtu si trajneri i tij, edhe 26-vjeçari e pret me qetësi përballjen e sotme, beson te forca e grupit dhe mbi të gjitha driblon zërat që flasin për disa oferta nga jashtë për të, por ndërkohë hyrjen e bën mbi ndjesitë që i ka dhënë çmimi i personal: "Ndihem shumë i vlerësuar. Është një shtysë më shumë për të arritur objektivat personalë dhe sidomos ato me ekipin, shprehet Trashi, teksa kalon menjëherë te dueli i radhës. - Luftëtari vjen pas një fitoreje me Skënderbeun dhe moralisht do të jenë shumë lart. Gjithsesi, ne jemi përgatitur mirë dhe nuk e nënvlerësojmë kundërshtarin. E rëndësishme është që mos të shohim renditjen dhe në Gjirokastër të bëjmë lojën që ne duam dhe kemi përgatitur. Ne nuk i trembemi askujt kur zbresim në fushë". Merkato personale - Përsa i përket ofertave të përfolura për të, Lorenc Trashi përgjigjet me diplomaci: "Me këto punë merret presidenti. Nuk mund të përgjigjem për këtë pjesë. Konkretisht nuk ka pasur ndonjë ofertë tunduese as për presidentin dhe as për mua, ndaj gjithçka mbetet e hapur, ndonëse unë jam i fokusuar te ndeshja e fundit e këtij viti. 'Lojtar i Vitit', kampion dhe transferim në Azerbajxhan, si Sabien Lilaj? Shpresoj të jetë kështu, por si fillim të shpresojmë të dalim kampion. Më pas gjithçka do të shkojë mbarë për të gjithë". Merkato e dimrit - Në lidhje me transferimin e Shkurtajt te Kukësi, por edhe për atë çfarë mund t'i nevojitet Partizanit, mbrojtësi i majtë përgjigjet: "Pa ia ulur vlerat si sulmues, Shkurtaj ka qenë kundërshtari im, por ai e ka bërë zgjedhjen e vet dhe mbetet rivali ynë në fushë. A i nevojiten përforcime Partizanit? Besoj se për përforcime ka nevojë edhe Reali i Madridit në këtë moment, jo më Partizani. Besoj se stafi do ulet të diskutojë për këtë temë, pas sfidës me Luftëtarin". Gega dhe roli - Në fund, përsa i përket marrëdhënies me trajnerin Gega dhe rolit që ai preferon, Lorenc Trashi thotë: "E pranoj se unë me pjesën e komunikimit kam pasur pak probleme në të shkuarën dhe për mua është gjë shumë e mirë që të kem një trajner që komunikon shumë dhe sillet si shok, për të shpjeguar mirë atë që duhet bërë në fushë. Ndërsa përsa i përket rolit, është normale që shumicës së lojtarëve i pëlqen të luajnë më pranë portës, po edhe si mbrojtës i majtë kam lirinë për të avancuar shumë në sulm dhe jam i lumtur".