Korabit i mjafton një eurogol ndaj Ilirisë

Korabi e ka mbyllur në mënyrën më të mirë këtë vit, duke fituar në fushën e vet përballë Ilirisë. Një 3-pikësh që e ngjit skuadrën dibrane në vendin e 4-t me 21 pikë, ndërsa do t’i duhet që ta ruajë këtë pozicion deri në fund të dy fazave të para për të qenë më pas në 5-shen e parë. Një supergol i Griseld Likës nga goditja e dënimit i dha fitoren Korabit në sfidën me fushë-krujasit që tashmë janë zyrtarisht në krizë dhe kanë zbritur në vendin e 8-të me 15 pikë. Një ndeshje shumë e luftuar, ndërsa Korabi është mbështetur sërish nga rreth 3000 tifozë që i kanë dhënë zemër në ndeshjen e fundit të vitit. NDESHJA Loja ka nisur e shpejtë dhe janë vendësit që kërkojnë golin që në minutat e para. Dibranët organizohen mirë dhe krijojnë rastet e para, por nuk arrijnë të finalizojnë si duhet. Ndërsa, miqtë i kushtojnë më shumë rëndësi mbrojtjes dhe mundohet të dalin me kundërsulme, por e kanë të vështirë të shënojnë. Skuka dhe Lika provojnë në disa raste me goditje nga jashtë zone për Korabin, por pa rezultat. Pavarësisht rasteve të krijuara, pjesa e parë mbyllet në barazim pa gola. E dyta nis në mënyrën më të mirë për vendësit. Dibranët fitojnë një goditje dënimi dhe trajneri Bubeqi ia beson goditjen Likës. Dhe, lojtari ia shpërblen duke bërë një ekzekutim perfekt dhe e dërgon topin në rrjetë, 1-0. Miqtë zgjohen pas këtij momenti dhe mundohen të barazojnë, por nuk kanë qartësinë e duhur. Fushëkrujasit provojnë me disa goditje nga jashtë zonës, por pa rezultat. Dibranët mbrohen mirë dhe e ruajnë avantazhin deri në fund, duke siguruar në këtë mënyrë një 3-pikësh shumë të rëndësishëm. Tashmë, ekipet do të pushojnë për disa ditë për t’iu rikthyer më pas përgatitjeve për pjesën e dytë të kampionatit që do të rinisë në fund të janarit.