Aris, Mavraj “tërbon” grekët
Klubi po “flak” një argjentinas, por kapiteni i Shqipërisë mund t’u nxijë jetën
Kapiteni i Kombëtares mund t’u nxijë jetën grekëve. Jo me sjellje negative, probleme apo telashe prej tij, por vetëm me... profesionalizëm. Mërgim Mavraj është nën kontratë me Aris edhe për një vit e gjysmë dhe gjithçka varet... në dorë të tij.
LARGIMET - Aris ka nxjerrë një listë në mediat pranë saj me tetë futbollistë që do të largohen në merkaton e janarit. Presidenti i klubit së bashku me drejtorin sportiv dhe trajnerin kanë përpiluar emrat që nuk bëjnë më pjesë në planet teknike me justifikimin se nuk kanë dhënë shumë dhe kanë qenë larg pritshmërive në këtë start sezoni. Madje, skuadra greke ka avancuar teksa me disa futbollistë kanë nisur negociatat dhe nuk pritet të ketë asnjë problem për largimin e tyre. Madje, edhe një argjentinas duket i bindur. Nikola Kolaso pritet që shumë shpejt të nënshkruajë marrëveshjen e largimit, edhe pse është ende nën kontratë me skuadrën greke. Po Mavraj?
KAPITENI I KOMBËTARES - Shqiptarët shpesh janë kritikuar pa të drejtë, sidomos në Greqi. Mjaft të kujtohet një foto e vjetër me Ergys Kaçen dhe kritikat apo përndjekjen që ju bë vite më parë për vetëm një foto me fanellën e UÇK-së. Për t’u rikthyer në temë, kapiteni i Kombëtares është gjithashtu në listën e emrave që skuadra kërkon t’i largojë në janar, por janë vetë mediat pranë Arisit që bëjnë me dije se nuk do të jetë aspak e lehtë. Kjo, për faktin e thjeshtë se mbrojtësi i Kombëtares shqiptare të futbollit ka një kontratë që kushton jo pak. Gjithashtu, kohëzgjatja e së cilës është edhe për të paktën një vit e gjysmë. Në këto kushte, skuadra greke nuk ka shumë në dorë për të vendosur. Ose të paktën, është e detyruar t’i përgjigjet kontratës, nëse kërkon që ta largojë Mavrajn. “Verdhezinjtë kanë nisur negociatat e vështira. Mavraj dhe Kolaso kanë kontrata edhe për 1.5 vjet, ndërsa argjentinasi mund të vendosë shpejt që të largohet”, shkruan “Pressaris”. Më tej, “Shootandgoal” shton se për kapitenin kuqezi nuk do të jetë aspak e thjeshtë.