Lëvizja e fundit, Luftëtari ndryshon administratorin
Përmbarimi ka bllokuar llogarinë e klubit
Ndryshime në klubin e Luftëtarit. Nuk bëhet fjalë për aksionerë të rinj, por për administratorin e klubit, i cili rezulton të jetë larguar që më 5 dhjetor. "Panorama Sport" mëson se Këshilli Mbikëqyrës i shoqërisë aksionere të Luftëtarit ka pranuar dorëheqjen e administratorit Donjaldo Hoxha. Ky i fundit ishte emëruar në këtë detyrë vetëm dy muaj më parë. Ndërkohë, anëtarët e Këshillit Mbikëqyrës të Luftëtarit, Grigor Tavo dhe Aleksandër Misto, kanë emëruar si administrator të ri të shoqërisë, Fatjon Kajushin, i cili do të jetë në këtë detyrë për një afat 3-vjeçar. Klubi i Luftëtarit ka depozituar vendimin edhe në QKB (Qendra Kombëtare e Biznesit), teksa sqaron se në mbledhje mungoi anëtari i Këshillit Mbikëqyrës, Artur Dadaj. Mirëpo, sipas statutit të shoqërisë, vendimet vlerësohen të vlefshme nëse janë të pranishëm më shumë se ½ e anëtarëve. Kësisoj, administratori i ri i klubit të Luftëtarit do të jetë pikërisht Fatjon Kajushi. Bllokimi - Ashtu si shumica e klubeve të futbollit në Shqipëri, edhe Luftëtari rezulton debitor në tatime. Mirëpo, së fundmi klubit i janë bllokuar llogaritë edhe nga Zyra e Përmbarimit. Gazeta zbulon se me një vendim të datës 4 dhjetor 2018 është vendosur masa e sekuestros konservative për klubin deri në një urdhër të dytë. Duke qenë se klubi nuk ka shlyer një detyrim ndaj kreditorit Kamela Petro, zyra përmbarimore ka marrë këtë vendim. Nuk dihet ende shuma e borxhit, por gjithsesi për momentin llogaritë bankare të klubit janë të bllokuara. Tashmë u mbetet drejtuesve për të zgjidhur këtë situatë, teksa emergjente është shlyerja e pagave të prapambetura të lojtarëve.